Anthony Joshua fitoi me KO në raundin e dytë ndaj Kristian Prengës të shtunën në mbrëmje, por mënyra se si erdhi fitorja ka nxitur teori konspirative. Joshua u rikthye në ring në Jeddah të Arabisë Saudite për herë të parë që nga aksidenti fatal automobilistik në Nigeri, ku në dhjetor të vitit 2025 humbën jetën miqtë e tij të ngushtë Sina Ghami dhe Latif Ayodele. AJ e çoi bilancin e tij në 29 fitore në 33 ndeshje pasi mposhti me nokaut në raundin e gjashtë Jake Paul pak më shumë se një javë përpara asaj dite tragjike në Lagos dhe 36-vjeçari ishte i vendosur të rikthehej në mënyrën më të mirë.
Pas fitores dominuese të Tyson Fury ndaj Mariusz Wach në një ndeshje të zhvilluar në Tajlandë të premten (24 korrik), Joshua shpresonte të shmangte çdo surprizë ndaj Prengës. Por në momentet e para të sfidës, kampioni i dyfishtë i peshave të rënda ishte shumë pranë një humbjeje të bujshme. Ai u trondit nga një goditje e fortë uppercut e Prengës në raundin e parë dhe më pas përfundoi sërish në tapet pak më vonë gjatë të njëjtit raund. Në atë moment dukej në prag të një prej humbjeve më të mëdha në historinë e peshave të rënda, ndërsa përballja e shumëpritur me Tyson Fury varej nga një fije.
Megjithatë, Joshua reagoi në mënyrë të jashtëzakonshme. Ai lëshoi një goditje të fuqishme me të djathtën në raundin e dytë, me goditjen vendimtare që rrëzoi shqiptarin dhe detyroi arbitrin ta ndërpriste ndeshjen. “Nuk ishte vetëm fuqia e grushtit. Ishte shpirti, ishte Latz, ishte Sina, ishin familjet. Më dhemb edhe të flas për këtë. Ka qenë shumë e vështirë”, tha britaniku. Ai u emocionua dhe u largua për pak çaste nga mikrofoni, përpara se të shtonte: “Janë vëllezërit e mi. Nuk dua të flas për këtë.” Kjo fitore dramatike hap rrugën për përballjen e shumëpritur me Tyson Fury më vonë gjatë këtij viti, por shumë njerëz nuk u bindën nga legjitimiteti i suksesit të Joshuas, pasi ai ishte rrëzuar dy herë në raundin e parë.
Simon Jordan ndan mendimin e tij për Anthony Joshua-Kristian Prenga
Që prej asaj kohe në internet kanë qarkulluar teori të shumta konspirative, mes tyre edhe ajo e Simon Jordan, i cili pretendoi se ndeshja ishte organizuar për të “zhvatur sa më shumë para”. “Nuk e besoj fare këtë… ndeshjen e #AnthonyJoshua… Rrëzohet dy herë dhe pastaj ndryshon ritmi, si ka mundësi?… Prenga ishte krejt ndryshe në raundin e dytë”, shkroi Jordan në X. “Diçka nuk shkon. Gjithçka është bërë për të nxjerrë sa më shumë para.” Ish-presidenti i Crystal Palace mendon se niveli i Prengës ra ndjeshëm në raundin e dytë, duke i hapur rrugën Joshua-s drejt fitores. Edhe shumë tifozë të boksit ndanë teori të ngjashme.
“Pse Kristiani e ngadalësoi sulmin në raundin e dytë? Diçka më duket e dyshimtë”, shkroi një përdorues. “Raundi i dytë i Prengës nuk më bindi aspak”, tha një tjetër. “Ndeshja më e manipuluar që kam parë ndonjëherë, Joshua kundër Prengës”, komentoi një tjetër. “Respekt për Anthony Joshua-n, por ajo ndeshje duhet të ketë qenë e kurdisur”, shkroi një përdorues tjetër. “Ai ndaloi plotësisht së sulmuari kur e kishte Joshua-n të tronditur dhe thjesht qëndroi aty derisa u nokautua… nëse ka ekspertë boksi, ma shpjegoni.” Joshua dhe Fury pritet të përballen në nëntor të vitit 2026, pasi kontratat janë firmosur, ndërsa vendi dhe ora e zhvillimit të ndeshjes ende nuk janë përcaktuar.
