Mazhoranca socialiste vendosi përjashtimin me 30 ditë të tjera për Agron Shehajn nga punimet e parlamentit. Sipas socialistëve, Shehaj nuk lejoi zhvillimin e procesit të votimit, ndërsa në sallë ishte kryeministri Edi Rama, të cilit i kërkoi dorëheqjen.
Veç Shehajt, edhe deputeti Erald Kapri është përjashtuar me 20 ditë nga punimet e parlamentit. Sipas Etikës, ata kanë penguar zhvillimin e seancës.
Shikoni pamjet e debatit të fortë mes deputetëve të Partisë Mundësia me Ramën të enjten në linkun poshtë:
-
Dalin pamjet e sherrit mes Ramës dhe Agron Shehajt në Kuvend (VIDEO)
18 Qershor, 22:06
Përpos këtij dënimi, Byroja e Kuvendit sot la në fuqi edhe 30 ditë përjashtim nga parlamenti për Agron Shehajn, për debatin e tij me ministrin e Petrit Malaj. Kujtojmë se javën e kaluar Shehaj u përplas me ministrin e Financave Malaj, i cili i përmendi Shehajt kompanitë e tij private, duke i thënë: “Tani do merremi ne me ty”.
Kjo solli reagimin e Shehajt, i cili iu përgjigj nga foltorja: “Po nëse më kërcënon mua këtu në Kuvend, çfarë i bën një qytetari të thjeshtë që del në protestë ti, mor maskara?”.
Me kërkesën e Taulant Ballës dhe një grupi deputetësh socialistë, Sekretariati i Etikës vendosi përjashtimin e Shehajt.
Kjo është hera e tretë brenda gjashtë muajsh që socialistët zgjedhin të heshtin Shehajn me përjashtim nga Parlamenti. Herën e parë ai u përjashtua me 1 muaj në mars, kur i nxorri Taulant Ballës fotot e dhunës policore ndaj protestuesve në Rrjoll.
Ky është edhe rasti i parë që një parti politike, Mundësia, që përfaqëson 50 mijë votues, lihet totalisht jashtë Kuvendit pasi të dy deputetët e saj janë të përjashtuar. ©Lapsi.al
