Fansat e Rihannës mund të kenë më në fund një arsye për të festuar. Pas një pritjeje gati një dekadëshe, këngëtarja duket se po punon për rikthimin e saj të madh muzikor.
Lajmin e ka zbuluar partneri i saj, reperi A$AP Rocky, gjatë një interviste në podcastin "The Jason Lee Show", ku konfirmoi se Rihanna aktualisht ndodhet në studio.
"Ajo është në studio tani," tha Rocky, duke shtuar me humor se ajo "po gatuan" diçka të re për fansat.
Reperi nuk dha shumë detaje rreth projektit, por hodhi poshtë edhe mundësinë që ai dhe Rihanna të publikojnë një album të përbashkët. Ai gjithashtu bëri shaka se mund të "futej në telashe" pasi zbuloi këtë informacion.
Rihanna, emri i vërtetë i së cilës është Robyn Fenty, nuk ka publikuar një album të plotë që prej vitit 2016, kur doli në treg "Anti", albumi që përfshinte hite si Work, Love on the Brain dhe Needed Me.
Gjatë këtyre viteve, artistja 38-vjeçare është fokusuar në sipërmarrjet e saj, duke ndërtuar perandorinë Fenty Beauty, ndërsa ka publikuar vetëm disa këngë të veçanta, përfshirë Lift Me Up për filmin Black Panther: Wakanda Forever.
Në një intervistë të mëparshme për Harper’s Bazaar, Rihanna kishte treguar se ndihej më pranë se kurrë me përfundimin e albumit të ri, por theksoi se nuk dëshironte të publikonte diçka që nuk do të përmbushte pritshmëritë e fansave.
