Protestuesi Erlis Sina ka reaguar pasi kryeministri Edi Rama publikoi fotografinë e tij në një postim të gjatë në rrjetet sociale kushtuar protestës qytetare para Kryeministrisë. Përmes një reagimi publik, Sina akuzoi kryeministrin se po përpiqet të zhvendosë vëmendjen nga arsyet reale që, sipas tij, kanë nxjerrë qytetarët në protestë.
Ai argumentoi se pjesëmarrësit në tubime nuk janë të manipuluar nga algoritmet, influencerët apo forcat politike. Sipas Sinës ata protestojnë për shkak të problemeve të përditshme me të cilat përballen, si vështirësitë ekonomike, shërbimet publike, papunësia dhe largimi i të rinjve nga vendi.
Në reagimin e tij, Sina e konsideroi qeverinë përgjegjëse për shumë prej shqetësimeve që kanë nxitur revoltën qytetare dhe akuzoi Ramën se po relativizon pakënaqësinë e qytetarëve duke e paraqitur atë si produkt të ndikimeve në rrjetet sociale. Ai i kërkoi gjithashtu kryeministrit të mos përdorë fotografinë e tij për të justifikuar apo shmangur problemet që kanë shtyrë mijëra qytetarë të dalin në shesh.
Reagimi i plotë i Erlis Sinës:
Përgjigje e detyruar për Edi Ramën!
UNË NUK JAM TI!
Mos më thuaj se te fotografia ime sheh veten tënde.
Unë nuk jam ti.
Unë nuk jam ai që ka pushtetin prej vitesh në dorë.
Nuk jam ai që firmos vendime që ndryshojnë jetët e njerëzve.
Nuk jam ai që kontrollon institucionet, buxhetet dhe fatet e këtij vendi.
Ti je.
Prandaj mos guxo të më thuash se halli im është si halli yt.
Ti nuk je viktima e halleve të mia.
Ti je autori i tyre.
Je autori i emigrimit të mijëra të rinjve që nuk panë më të ardhme në Shqipëri.
Je autori i padrejtësive që i detyrojnë njerëzit të largohen nga vendi i tyre.
Je autori i arrogancës së një pushteti që nuk dëgjon më askënd përveç vetes.
Kur thua se ke frikë nga ata që mund t’i bëjnë keq Shqipërisë, harro një gjë:
Nuk ka humnerë më të thellë se vjedhja e votës.
Nuk ka humnerë më të thellë se grabitja e pronës.
Nuk ka humnerë më të thellë se shkatërrimi i dinjitetit.
Nuk ka humnerë më të thellë se vjedhja e së ardhmes së një brezi të tërë.
Mijëra njerëz nuk mbushin sheshet sepse i manipulon algoritmi.
Nuk protestojnë sepse ua kërkojnë influencerat.
Nuk zemërohen sepse ua dikton opozita.
Ata dalin në shesh sepse jetojnë realitetin çdo ditë.
Sepse paguajnë faturat.
Sepse kërkojnë punë.
Sepse presin në spitale.
Sepse shohin fëmijët të largohen.
Sepse ndihen të huaj në vendin e tyre.
Dhe kur ti përpiqesh t’i paraqesësh si turmë të përdorur, nuk po i kupton.
Po i përçmon.
Fotografia ime në murin tënd më bën pis.
Mos e përdor për të larë përgjegjësitë e tua.
Mos e përdor për të fshehur dështimet e tua.
Mos e përdor për të ndërtuar historinë tënde si shpëtimtar.
Unë nuk jam ti.
Dhe nëse jam në shesh, nuk jam aty sepse më ka mashtruar dikush.
Jam aty sepse e di shumë mirë kush më ka sjellë deri këtu.
