Grupi Parlamentar i Partisë Demokratike i ka kërkuar Kuvendit zhvillimin e një mocioni me debat. Grupi i PD shprehet se protestat e vazhdueshme qytetare dhe shqetësimet mbi transparencën e qeverisë kërkojnë diskutim të menjëhershëm parlamentar.
Në kërkesën, që mban firmën e kryetarit të grupit Gazment Bardhi, theksohet se protestuesit kanë paraqitur pesë kërkesa kryesore: dorëheqjen e qeverisë, shfuqizimin e kuadrit ligjor për investimet strategjike, anulimin e kuadrit ligjor të njohur si “Paketa e Maleve”, anulimin e ndryshimeve në ligjin për zonat e mbrojtura dhe anulimin e ndryshimeve në ligjin për trashëgiminë kulturore shqiptare
Këto çështje janë adresuar edhe nga Partia Demokratike, pasi janë depozituar nismat ligjore për shfuqizimin e këtyre ligjeve. Me herët Partia Demokratike ka kërkuar edhe zhvillimin e një mocioni me debat, mbi Raportin e Komisionit Europian për procesin e integrimit.
