Nga Arbër Zaimi
Përbaltja e emrit të dëshmorit e heroit të tre luftërave UÇK-së Tahir Sinanit, po edhe e emrit të anëtarit të shtabit të përgjithshëm të UÇK-së Dilaver Goxhajt, është skandal i rrezikshëm që nuk kalon pa u vënë re nga shërbimet antishqiptare dhe nga Beogradi.
Ata që përbaltën emrat e tyre e bënë këtë si zakonisht në bashkëpunim, Tiranë-Prishtinë. Arsyeja e përbaltjes? Ruajtja e pushtetit.
Pra edhe një herë, për të ruajtur pushtetin në Tiranë, për t’u dhënë atyre një “armë” kundër protestuesve, disa nga Prishtina nxorën dokumenta e deklarata të pakontekstualizuara e të keqinterpretuara, që shpjegojnë bash ashtu siç e do interesi serb, se UÇK-ja paska qenë e drejtuar nga mercenarë deri edhe në shtab të përgjithshëm, e se edhe heronjtë e dëshmorët e saj ishin thjesht mercenarë, njerëz të paguar për të vdekur.
Këto akuza që janë bërë kinse paqëllimshëm, se qëllimi i vërtetë ishte delegjitimimi i protestuesit Dritan Goxhaj, tregojnë se këto parti e këta politikanë janë gati të shkelin mbi çdo interes kombëtar e mbi çdo gjë të shenjtë, për të ruajtur pushtetin e vet e për të denigruar kundërshtarët.
E pra, kështu ka ndodhur historikisht me ata që duan pushtetin më shumë se kombin dhe shtetin. Për ta ruajtur pushtetin e dikurshëm në Prishtinë dikush, u sajuan akuzat që më pas u përdorën nga Dick Marty e Carla del Ponte. Mbi këto akuza u ngrit dhe Gjykata Speciale, teksa ata që sajuan akuzat për hatër të pushtetit, sot derdhin lot krokodili.
