David Beckham duket se ka bërë një hap drejt pajtimit me djalin e tij të madh, Brooklyn Beckham, duke i dërguar një mesazh publik plot dashuri në Ditën e Babait, pavarësisht raportimeve për marrëdhëniet e tensionuara mes tyre.
Ish-futbollisti 51-vjeçar publikoi në Instagram një seri fotografish familjare, ku përfshiu edhe Brooklyn-in, me të cilin thuhet se nuk ka folur prej më shumë se një viti.
Mes fotove ishte një imazh i vjetër i Davidit me Brooklyn-in kur ky i fundit ishte fëmijë, si dhe një fotografi ku shfaqet me të katër fëmijët e tij.
“Të qenit baba është roli më i rëndësishëm që kam. Ju dua të gjithëve dhe falënderoj Victoria-n që më ka dhënë familjen tonë të bukur. Gëzuar Ditën e Babait për të gjithë baballarët kudo në botë”, shkroi Beckham.
Edhe Victoria Beckham përfshiu Brooklyn-in në urimin e saj për bashkëshortin, duke publikuar një foto familjare nga kohët më të lumtura me Davidin dhe fëmijët e tyre: Brooklyn, Romeo, Cruz dhe Harper.
Megjithatë, ndryshe nga vëllezërit e tij, Romeo Beckham dhe Cruz Beckham, të cilët publikuan mesazhe për babanë e tyre në rrjetet sociale, Brooklyn nuk reagoi publikisht.
Postimi i Davidit erdhi vetëm pak ditë pasi Brooklyn u përfshi në polemika për një reklamë të re të kompanisë së shpërndarjes së ushqimit DoorDash. Në videon promovuese, ai bën një koment që shumë e interpretuan si një referencë ndaj konfliktit të raportuar me familjen Beckham.
Sipas mediave britanike, disa persona pranë familjes janë shprehur të zhgënjyer nga reklama, duke pretenduar se ajo tallet me situatën familjare që ka qenë në qendër të vëmendjes së mediave prej muajsh.
Megjithëse asnjëra palë nuk ka komentuar publikisht mbi raportet për përçarje familjare, postimi i fundit i David Beckham është parë nga shumë fansa si një shenjë se ai dëshiron të lërë derën hapur për një pajtim me djalin e tij të madh.
