Ish-deputeti socialist Pandeli Majko i është bashkuar kritikave ndaj nismës së qeverisë shqiptare për hapjen e një konsullate serbe në Shkodër.
Majko shkruan se nuk ka krahasim mes një konsullate serbe në Shkodër dhe një konsullate shqiptare në Luginën e Preshevës. Sipas tij, duke bërë këtë lëvizje në Shkodër, Serbia tejkalon Kosovën dhe Malin e zi dhe merr më shumë se një konsullatë.
Reagimi i plotë i Pandeli Majkos:
‘Konsullatë serbe në Shkodër?!… Në Shkodër konsullata serbe do të ketë më rëndësi se sa vetë minoriteti!
Kundrejt hapjes së konsullatës serbe në Shkodër do të hapet konsullata shqiptare në Luginën e Preshevës! Krahasimi është më shumë se një ironi…!
Lugina e Preshevës është një vazhdimësi territoriale e banuar nga shqiptarët e mbetur në sovranitetin e Serbisë!
Konsullata në Luginën e Preshevës ‘shmang’ Kosovën! Në Shkodër, konsullata serbe ka Malin e Zi në mes!…
Për Shqipërinë duket se konsullata është trajtuar si shprehje e interesit standart! Për Serbinë, që nuk njeh sovranitetin e Kosovës dhe diskuton identitetin e Malit të Zi, është diçka tjetër!
Serbia në Shkodër ka marrë më shumë se një konsullatë!’.
