Kreu i SPAK, Klodian Braho, la të hapur mundësinë e një kërkese të re drejtuar Kuvendit për heqjen e imunitetit të zëvendëskryeministres Belinda Balluku, ndërsa bëri të ditur se hetimet ndaj saj kanë vijuar me intensitet edhe pas rrëzimit të kërkesës së parë nga Parlamenti.
I pyetur nëse SPAK do t’i drejtohet sërish Kuvendit, Braho nuk dha një përgjigje të prerë, por theksoi se vendimi do të varet nga provat e reja që do të mblidhen gjatë hetimit.
“Hetimet edhe pas atij vendimi kanë vazhduar me intensitet. Kanë ecur dhe më tej. Nuk mund të them nëse do të bëhet apo jo një kërkesë e re. Vendimi është i kushtëzuar nga rrethanat e hetimit, rezultatet që do të kemi dhe parlamenti e ka marrë një vendim për një kërkesë që ne bëmë. Nuk mund të shkojmë sërish me të njëjtat prova”, deklaroi kreu i SPAK.
I pyetur edhe për materialet e publikuara në kuadër të “Albanian Files”, Braho tha se SPAK ka marrë dy materiale dhe se aktualisht ndodhen në fazën e verifikimit.
“Ka dy materiale që kanë mbërritur në prokurori. Jemi në fazë verifikimi. Nuk mund të jap më tepër detaje” tha ai.
