Kompania MABCO Constructions, e biznesmenit Behgjet Pacolli, ka nisur publikimin e një kronologjie të dokumenteve dhe veprimeve që, sipas saj, qëndrojnë në origjinë të konfliktit për kontrollin e shoqërisë koncesionare të Aeroportit Ndërkombëtar të Vlorës.
Në pjesën e parë të kësaj kronologjie, të publikuar nga Pacolli, MABCO ngre akuza të rënda lidhur me një dokument të hartuar më 3 prill 2025 pranë noteres Valbona Selimi, përmes të cilit pretendohej transferimi i 47% të kuotave të MABCO-s te ortaku minoritar Valon Ademi. Nëse ky transferim do të realizohej, pjesëmarrja e Ademit në shoqëri do të kalonte nga 2% në 49%.
MABCO pretendon se jo vetëm nuk e kishte autorizuar këtë transaksion, por se dokumentacioni ishte mbështetur në përdorimin e firmës së Behgjet Pacollit, të marrë nga një dokument i vitit 2023 që kishte një qëllim tjetër.
“Z. Pacolli nuk ka qenë i pranishëm në zyrën e noteres Valbona Selimi dhe nuk ka dhënë autorizim për tjetërsimin e kuotave të MABCO-s”, thuhet në deklaratën e kompanisë.
Sipas MABCO-s, dokumenti i transferimit ishte mbajtur i fshehtë dhe kompania mësoi për ekzistencën e tij vetëm më 19 gusht 2025. Kompania thotë se nuk ka dijeni nëse është tentuar regjistrimi i transferimit në Qendrën Kombëtare të Biznesit, por konfirmon se ndryshimi i pronësisë nuk është regjistruar.
Pacolli e paraqet këtë episod si pikënisjen e një zinxhiri veprimesh që, sipas MABCO-s, synuan ta nxirrnin aksionerin kontrollues nga administrimi dhe menaxhimi i kompanisë koncesionare të Aeroportit të Vlorës. MABCO ka paralajmëruar se kronologjia do të vijojë me publikimin e episodeve dhe dokumenteve të tjera që lidhen me konfliktin.
NJOFTIMI I PLOTE I MABCO
KRONOLOGJIA E FAKTEVE DHE VEPRIMEVE QË TREGON SI LINDI SKANDALI I AEROPORTIT TË VLORËS DHE SI VEPRUAN INSTITUCIONET ( Pale e kontrates se koncesionit) PËR TË LIKUIDUAR MABCON NGA E DREJTA E MENAXHIMIT TE KOMPANISE SE SAJ.
19 gusht 2025 – Zbulimi i dokumenteve për transferimin e 47% të kuotave të MABCO-s
Më 19 gusht 2025, MABCO mësoi rastësisht se më 3 prill 2025, vetëm pak ditë para zgjedhjeve parlamentare në Shqipëri, pranë noteres Valbona Selimi ishte hartuar një akt për transferimin e 47% të kuotave të MABCO-s në VIA.
Sipas këtij dokumenti, ish-administratori i VIA-s, Valon Lluka, do t’ia transferonte këto kuota Valon Ademit, zotëruesit të vetëm 2% të aksioneve, duke e çuar atë praktikisht nga 2% në 49%.
MABCO deklaron se nuk ka autorizuar kurrë një transaksion të tillë.
Dokumentacioni, sipas MABCO-s, është mbështetur në përdorimin e një firme të z. Behgjet Pacolli të marrë nga një dokument i vitit 2023, i cili ishte hartuar për një qëllim krejtësisht tjetër. Z. Pacolli nuk ka qenë i pranishëm në zyrën e noteres Valbona Selimi dhe nuk ka dhënë autorizim për tjetërsimin e kuotave të MABCO-s.
Për më tepër, që nga viti 2011, z. Pacolli nuk ka të drejtë ligjore të nënshkruajë dokumente që krijojnë detyrime për MABCO-n. Të drejtën e përfaqësimit e kanë vetëm personat e regjistruar në Regjistrin Tregtar të kompanisë, ku emri i tij nuk figuron. Ky fakt është konfirmuar edhe në një procedurë gjyqësore në Lugano.
Firma e z. Pacolli rezulton të jetë përdorur gjithashtu në një vendim të pretenduar të Bordit të Drejtorëve të MABCO-s, ndonëse ai nuk ishte as anëtar, as drejtues i këtij Bordi dhe nuk kishte kompetencë për ta nënshkruar atë.
Dokumenti i transferimit u mbajt i fshehtë dhe ekzistenca e tij u zbulua nga MABCO vetëm më 19 gusht 2025.
A kishte pasur tentativa për regjistrimin e transferimit të kvotave në QKB, Mabco nuk e din, por regjistrimi nuk ka ndodhur.
Ky është momenti nga i cili fillon zinxhiri i ngjarjeve që më pas çoi në konfliktin dhe situatën e sotme në Aeroportin Ndërkombëtar të Vlorës.
V A Z H D O N
Zyra për Informim
MABCO Constructions S.A.
Lugano, Zvicër
