Deputetja e Lëvizjes Vetëvendosje, Albulena Haxhiu, para nisjes së seancës konstituive të Kuvendit, tha se LVV-ja ka ofruar pozitën e kryeparlamentarit për partitë e tjera, me qëllim që vendi të mos shkojë në zgjedhje të reja. Haxhiu u bëri thirrje partive të tjera që të marrin pjesë në seancë dhe të bëjnë përpjekje për arritjen e një marrëveshjeje.
"Kushdo që ka probleme me seancën e sotme, unë e ftoj t’i drejtohet Gjykatës Kushtetuese”, tha Haxhiu.
Ajo akuzoi partitë e tjera se mund të jenë duke tentuar ta çojnë vendin sërish në zgjedhje, duke e cilësuar këtë si gabim. Duke komentuar situatën e mbrëmshme, kur dyert e sallës së seancave plenare ishin të mbyllura, Haxhiu tha se kjo është procedurë e rregullt kur nuk ka seancë plenare të caktuar zyrtarisht.
“Kushdo që thotë se janë mbyllur dyert e Kuvendit për deputetët e opozitës nuk po e thotë të vërtetën”, deklaroi ajo.
Haxhiu shtoi se, nëse do të kishte 40 nënshkrime të protokoluara, seanca do të mbahej, ndërsa sipas saj, mbrëmë kishte vetëm njoftim dhe jo nënshkrime të protokoluara.
