Ashtu siç pritej gjatë orëve të fundit, Roberto Mancini është trajneri i ri i kombëtares italiane, pasi kandidatura e Andrea Pirlos dështoi, duke sjellë edhe dorëheqjen e Paolo Maldinit dhe Leonardos.
Lajmi u bë i ditur nga presidenti i FIGC-së, Giovanni Malagò, gjatë mbledhjes së Këshillit Federal në Romë. Më pas u zyrtarizua edhe emërimi i Claudio Ranierit si Drejtor Teknik dhe President i Club Italia.
Mancini rikthehet në krye të Italisë, Malagò vendos veton
Malagò mbajti premtimin e bërë një ditë më parë, duke njoftuar brenda afatit emrin e pasuesit të Gennaro Gattusos dhe të trajnerit të përkohshëm Baldini. Presidenti i ri i futbollit italian, i braktisur nga Paolo Maldini, i cili duhej të udhëhiqte rindërtimin e futbollit italian në vitet e ardhshme, vendosi të veprojë sipas bindjes së tij.
Asnjë revolucion, asnjë ndryshim i madh që kishin ëndërruar ata që e kishin përshëndetur ardhjen e Maldinit si simbol i një epoke të re. Në vend të kësaj, Malagò zgjodhi “rrugën e sigurt”, duke rikthyer Mancinin, me të cilin e lidh edhe një miqësi e gjatë.
Nga triumfi në Wembley te eliminimi nga Maqedonia
Objektivi kryesor është Botërori i vitit 2030, ku Italia synon të rikualifikohet pas mungesës në tre edicionet e fundit. Ndërkohë, në horizont janë edhe Kampionati Europian pas dy vitesh, një turne që Mancini e fitoi gjatë eksperiencës së tij të parë në krye të Italisë.
Megjithatë, nëse triumfi në Wembley në vitin 2021 mbetet kulmi i karrierës së tij si trajner i kombëtares, ndaj Mancinit kishte edhe kritika për mënyrën se si u largua nga Italia në verën e vitit 2023 për të pranuar ofertën shumë të majme si trajner i Arabisë Saudite. Në atë periudhë marrëdhënia me kombëtaren ishte krisur tashmë, pasi triumfi në Euro 2020 ishte pasuar nga dështimi i bujshëm për t’u kualifikuar në Botërorin e Katarit 2022, pas eliminimit nga Maqedonia e Veriut në “play-off”, si dhe nga fillimi jo bindës i eliminatoreve të Euro 2024.
Drejtori i ri Teknik do të jetë Claudio Ranieri
Tashmë gjithçka lihet pas dhe Italia nis një kapitull të ri me synimin për të rikthyer sukseset. Claudio Ranieri do të marrë rolin e Drejtorit Teknik të kombëtareve italiane, detyrë që fillimisht ishte menduar t’i besohej dyshes Paolo Maldini-Leonardo.
