Disa granata të ndryshkura dhe dy armë të mbuluara me rrobë janë konstatuar në anën e rrugës së plazhit të vjetër. Në zonën që shkon në drejtim të Zvërnecit te kanali i hidrovorit, një qytetare ka parë armët dhe granatat anës rrugës. Ato janë në një prej akseve rrugore më të frekuentuara në qytet dhe kanë dalë në pjesën anësore të rrugës. Qytetarja e cila ka zbuluar armët tregon se ka qënë duke kaluar kur ka shkelur njërën prej tyre. Shehaj thotë se i ka gjetur në pjesën anësore të rrugës. Menjëherë pas zbulimit, policia ka ngritur një perimetër e sigurie dhe ka marrë masa për izolimin e zonës.
Nga verifikimet e para rezulton se armët dhe granatat kanë qenë të mbështjella dhe nuk paraqesin rrezik të menjëhershëm. Në vendngjarje priten specialistët përkatës, të cilët do të bëjnë largimin dhe asgjësimin e tyre, ndërsa policia vijon hetimet për të sqaruar rrethanat e këtij rasti.
