Sepp Blatter, njeriu që e çoi FIFA-n në epokën e biznesit të globalizuar, refuzoi deri në fund të bënte publik pagën e tij. Pasi u rrëzua nga posti, në kulmin e skandalit më të madh në historinë e organizatës, qeveria e futbollit botëror miratoi një sërë reformash për të rritur transparencën dhe, në mars të vitit 2016, publikoi shifrat për vitin 2015, të fundit të drejtimit të tij: 3.3 milionë euro.
Që nga ajo kohë, në bilancet e FIFA-s është përfshirë një tabelë e detajuar me kompensimin e presidentit. Kështu, Gianni Infantino, në fillim të mandatit të tij të parë në vitin 2016, përfitoi 1.5 milionë franga zvicerane, ekuivalente me 1.4 milionë euro. Gjatë këtij dhjetëvjeçari paga e tij është rritur vazhdimisht, duke arritur në 5.2 milionë euro në vitin 2025. Ndërkohë, të ardhurat e FIFA-s janë rritur nga afro 500 milionë euro në vitin 2016 në 2.3 miliardë euro në vitin 2025. Ndërsa këtë vit, falë Botërorit të zhvilluar në SHBA, pritet të arrijnë rreth 8 miliardë euro. Mbetet kurioziteti për të parë se sa do të përfitojë presidenti që ka përqafuar maksimalisht komercializimin e Kupës së Botës, duke shfrytëzuar potencialin e jashtëzakonshëm të tregut amerikan.
Diferenca
Në detaje, vitin e kaluar Infantino përfitoi 2.8 milionë euro bruto si pagë bazë dhe 2.4 milionë euro bonus. Sekretari i përgjithshëm Mattias Grafström mori 1.7 milionë euro pagë fikse dhe 900 mijë euro shpërblime variabël. Në dokumentet financiare sqarohet se bonuset e vitit 2025 do të paguhen gjatë vitit 2026 dhe se FIFA kontribuon edhe në sigurimet shoqërore zvicerane, fondin e pensionit, sigurimin ndaj aksidenteve dhe përfitime të tjera kontraktuale për të dy drejtuesit. Megjithatë, këto përfitime nuk janë të detajuara në dokumentet e publikuara në Zyrih. Ato dalin në pah nga dokumentacioni që FIFA, si organizatë jofitimprurëse e përjashtuar nga taksat në SHBA që prej Botërorit 1994, është e detyruar t’i paraqesë çdo vit Shërbimit Amerikan të të Ardhurave (IRS).
Formulari më i fundit 990 tregon se Infantino ka përfituar gjithsej 5.9 milionë euro gjatë vitit 2024, kundrejt 4.5 milionëve të raportuara në bilancin e FIFA-s. Diferenca shpjegohet nga zëri “Other reportable compensation” (“Kompensime të tjera të deklarueshme”). Kjo do të thotë se, duke përfshirë edhe përfitimet shtesë, paga reale e Infantinos tashmë llogaritet rreth 6 milionë euro në vit. Në total, gjatë dhjetë viteve të fundit, kostot e FIFA-s për Infantinon kanë kaluar shifrën e 30 milionë eurove. Rritja e parë e madhe ndodhi në vitin 2018, kur paga u shtua me rreth 1 milion euro. Në vitet 2020 dhe 2021, për shkak të pandemisë, shuma mbeti e pandryshuar krahasuar me vitin 2019. Më pas rritja rifilloi: plus 600 mijë euro në vitin 2022, plus 800 mijë euro në vitin 2023, deri te rritja e fundit e vitit 2025.
Të tjerët
Vitin e kaluar FIFA shpërndau në total 32 milionë euro (duke përfshirë kontributet për pensionet) për anëtarët e Këshillit dhe drejtuesit më të lartë. Këshilli përbëhet nga 37 persona, mes tyre Infantino dhe tetë zëvendëspresidentë. Sipas rregullave në fuqi, zëvendëspresidentët përfitojnë 250 mijë dollarë neto në vit (rreth 220 mijë euro), ndërsa shuma rritet në 300 mijë dollarë (rreth 260 mijë euro) nëse mbajnë edhe postin e presidentit të një konfederate, si në rastin e Aleksander Čeferin, presidentit të UEFA-s. “Çdo anëtar – thuhet në bilanc – merr gjithashtu një dietë ditore prej 250 dollarësh për ditët e shërbimit, e cila ulet në 150 dollarë nëse FIFA mbulon mëngjesin dhe drekën ose darkën.” Në vitin 2025, anëtarët e Këshillit përfituan gjithsej 11 milionë euro.
Infantino dhe Grafström, megjithatë, regjistrohen financiarisht si drejtues ekzekutivë: presidenti, sekretari i përgjithshëm dhe dhjetë drejtuesit kryesorë të sektorëve të ndryshëm përfituan së bashku 21 milionë euro. Seksioni “Compensation”, pjesë e angazhimit statutor të FIFA-s për transparencë, publikon në mënyrë të detajuar kompensimet vjetore të figurave kyçe të organizatës, nga Infantino deri te presidentët e komisioneve. Duke shfletuar listën shfaqet edhe emri i një italiani: Pierluigi Collina, drejtuesi i sektorit të arbitrave të FIFA-s, i cili në vitin 2025 përfitoi një pagë prej 215 mijë dollarësh, ose rreth 180 mijë euro.
