Mediat ndërkombëtare vijojnë të raportojnë dhe transmetojnë drejtpërdrejt protestën që prej ditësh po zhvillohet në Tiranë. Tubimi, i cili nisi si kundërshtim ndaj projektit në Nartë , është shndërruar tashmë në një lëvizje më të gjerë kundër qeverisë së kryeministrit Edi Rama. Agjencia prestigjioze e lajmeve Reuters raportoi se mijëra qytetarë dolën në rrugët e kryeqytetit në atë që konsiderohet protesta më e madhe e organizuar deri më tani. Sipas agjencisë, protestuesit marshuan me pankarta ku lexohej “Shqipëria nuk është në shitje”. Reuters raporton se tubuesit brohoritën slogane kundër qeverisë përpara godinës së Kryeministrisë, ndërsa turma u shtri përgjatë akseve kryesore të Tiranës.
Në raportimin e saj, agjencia Reuters e cilëson situatën si një tjetër provë politike për Edi Ramën, i cili ndodhet në pushtet prej vitit 2013. Në shkrim thuhet se një pjesë e qytetarëve shprehin pakënaqësi për ritmin e reformave, luftën kundër korrupsionit dhe cilësinë e shërbimeve publike, veçanërisht në sektorë si shëndetësia.
Reuters sjell edhe qëndrimin e kryeministrit Rama, i cili ka deklaruar se projekti që ka nxitur protestat do të ecë përpara dhe do të zbatohet me përgjegjësi, ndërsa ka nënvizuar angazhimin e institucioneve në luftën kundër korrupsionit, duke përmendur edhe rolin e SPAK.
