Ryan Reynolds nuk ka ndërmend të kërkojë falje për mesazhet private, tashmë të bëra publike, në të cilat ai sulmon Justin Baldoni, mes betejës ligjore që po vazhdon mes bashkëshortes së tij, Blake Lively, dhe aktorit-regjisor.
Pas publikimit të mesazheve të ç’vulosura nga gjykata, përfaqësuesi i Reynolds reagoi duke theksuar se aktori thjesht po mbronte gruan e tij.
“Po, Ryan u përfshi — kush është ai burrë nuk do ta mbështeste gruan dhe nënën e fëmijëve të tij?” tha përfaqësuesi i aktorit për Puck News.
Sipas deklaratës, Reynolds ka qenë dëshmitar i luftës së përditshme të Blake Lively për t’u përballur me atë që ajo e ka cilësuar si ngacmim seksual në mënyrë private dhe me respekt, por që më pas, sipas tyre, është shoqëruar me hakmarrje.
“Nëse ka diçka, Ryan mendon se nuk ka qenë mjaftueshëm i zemëruar,” shtoi përfaqësuesi i tij.
“Ai beson fort dhe do të mbrojë gjithmonë të drejtën themelore për një vend pune të sigurt, pa ngacmime dhe pa hakmarrje — për gruan e tij dhe për këdo tjetër.”
Mesazhet e publikuara përfshijnë biseda të Reynolds me agjentin e tij, Warren Zavala, nga gushti i vitit 2024. Në to, Reynolds përmend edhe betejën ligjore të bujshme mes Johnny Depp dhe Amber Heard, duke sugjeruar se përballje të tilla publike dëmtojnë të gjitha palët.
Në një nga mesazhet, Zavala e përshkruan Baldonin me fjalë të ashpra, ndërsa Reynolds e quan atë një “gabim njerëzor” dhe më vonë, sipas dokumenteve, përdor edhe shprehje të tjera fyese ndaj tij.
Blake Lively ka paditur Justin Baldonin në dhjetor 2024, duke e akuzuar për ngacmim seksual gjatë xhirimeve të filmit “It Ends With Us”. Baldoni i ka mohuar vazhdimisht të gjitha akuzat.
