Chiara Ferragni ka reaguar publikisht pas vendimit të gjykatës që mbylli përfundimisht procedimin penal për mashtrim ndaj saj. Vetëm 24 orë pas vendimit, influencerja italiane ka zgjedhur të flasë përmes rrjetit të saj social, Instagram.
Ferragni e përshkruan këtë periudhë si një nga më të vështirat e jetës së saj, duke vënë një pikë përfundimtare mbi dy vite të shënuara nga presioni mediatik dhe hetimet ligjore.
Në reagimin e saj, ajo thekson fillimisht faktin që e konsideron thelbësor: çështja është mbyllur me pushim procedimi, pasi gjykata ka vendosur se nuk ekzistonin as kushtet minimale për nisjen e një procesi penal. Sipas saj, kjo nuk është një “pafajësi e pjesshme”, siç është aluduar nga disa, por një vendim i qartë dhe përfundimtar në planin penal.
Ferragni bën një dallim të qartë mes dy planeve: nga njëra anë, përgjegjësia për reklamim të gabuar, të cilën ajo thotë se e ka pranuar që në fillim, duke e quajtur një gabim administrativ për të cilin ka marrë përgjegjësi, ka paguar pasojat dhe ka kërkuar ndjesë publike. Nga ana tjetër, ajo mohon kategorikisht çdo qëllim për mashtrim penal.
Influencerja thekson se në atë periudhë ishte në kulmin e karrierës dhe imazhit të saj publik dhe se nuk kishte asnjë përfitim ekonomik nga shitjet, pasi pagesat për bashkëpunimet ishin fikse dhe jo të lidhura me volumin e produkteve të shitura.
“Tarifa ime për ato bashkëpunime ishte e përcaktuar paraprakisht dhe nuk varej nga shitjet. Nuk kishte asnjë arsye ekonomike apo logjike që unë të mashtroja publikun,” shkruan Ferragni, duke nënvizuar se një gabim administrativ nuk mund të barazohet me një vepër penale.
Pjesa më e fortë e mesazhit të saj lidhet me barrën psikologjike të kohës. Ajo flet për dy vite të jetuara nën gjykim të vazhdueshëm publik, pa pasur mundësinë të mbrohej plotësisht, ndërsa procedimi mbetej i hapur. Një situatë që, sipas saj, e ka shënuar thellë, më shumë sesa vetë vendimi gjyqësor.
[embed]https://www.instagram.com/chiaraferragni/p/DTiYTkbiAPG/[/embed]
