Justin Baldoni po kundërshton përpjekjet e Blake Lively për të mbajtur të fshehtë identitetin e disa figurave shumë të njohura publike, përfshirë Taylor Swift dhe Ryan Reynolds, në kuadër të betejës së tyre ligjore që lidhet me filmin “It Ends With Us”.
Sipas dokumenteve gjyqësore të siguruara nga TMZ, Baldoni ka paraqitur të hënën një kundërshtim zyrtar ndaj kërkesës së Lively për të redaktuar (fshehur) emrat e personazheve të famshëm të përfshirë në çështje.
Aktori dhe regjisori argumenton se kërkesat e saj nuk përmbushin standardet ligjore për mbylljen e informacionit në këtë fazë të procesit.
Në dokumente, Lively e ka përshkruar bashkëshortin e saj, Ryan Reynolds, si një “palë e tretë e pafajshme”. Megjithatë, avokatët e Baldonit pretendojnë se Reynolds ka qenë aktivisht i përfshirë në prodhimin e filmit, përfshirë rishkrimin e një skene dhe një përballje me Baldonin lidhur me një koment që u interpretua si fyes për trupin e Lively-t.
Ekipi ligjor i Baldonit shprehet se përpjekja për të mbyllur dokumentet synon të mbrojë imazhin publik të miqve të famshëm të Lively-t, të cilët, sipas tyre, ajo i ka “angazhuar si mbështetës” në konfliktin kundër kompanive të përfshira në prodhimin e filmit.
Avokatët theksojnë gjithashtu se identitetet e dëshmitarëve të mundshëm — mes tyre Taylor Swift, Hugh Jackman, Emily Blunt dhe America Ferrera — janë tashmë publike dhe nuk ka arsye ligjore për t’i fshehur.
Taylor Swift u përfshi për herë të parë në këtë çështje në janar 2025, kur Baldoni paraqiti një kundërpadi ndaj Lively-t (e cila më vonë u hodh poshtë). Në atë padi përfshiheshin mesazhe ku Baldoni pretendonte se ishte ndier i “ushtruar nën presion” nga Lively, Reynolds dhe Swift për të pranuar një skenë të rishkruar nga aktorja.
Në dokumente, Lively i kishte quajtur Swift dhe Reynolds “dragonjtë” e saj mbrojtës — një referencë ndaj ndikimit të tyre të madh në industri.
Avokati i Baldonit kishte deklaruar se regjisori po përballej jo vetëm me Lively-n, por edhe me “dy nga personazhet më të fuqishëm dhe më të pasur në botën e argëtimit”.
Ndërsa padia e Baldonit për shpifje dhe shantazh u rrëzua në qershor 2025, padia e Blake Lively-t mbetet aktive. Ajo e akuzon Baldonin për ngacmim seksual, hakmarrje, shkelje kontrate, shkaktim të dëmit emocional, shkelje privatësie dhe humbje të të ardhurave. Gjyqi pritet të nisë më 18 maj 2026.
