Will Smith është paditur për ngacmim seksual, sipas një padie të depozituar në Los Angeles pak para Vitit të Ri, raportojnë dokumente gjyqësore të siguruara nga Fox News Digital.
Padia është ngritur nga Brian King Joseph, violinist profesionist dhe ish-konkurrent i emisionit “America’s Got Talent”, i cili pretendon se Smith ka qenë duke e “përgatitur dhe manipuluar qëllimisht për shfrytëzim të mëtejshëm seksual”.
Në padi përfshihen gjithashtu bashkëpunëtorë të Smith dhe kompania e tij Treyball Studios Management, Inc.
Sipas dokumenteve, pas performancës së tyre të parë së bashku në dhjetor 2024, Smith dyshohet se e ftoi Joseph të bëhej pjesë e turneut “Based on a True Story: 2025 Tour”, si dhe të kontribuonte në disa këngë të albumit të ardhshëm të reperit.
Joseph pretendon se marrëdhënia mes tyre u bë gjithnjë e më e afërt dhe se Smith i ka thënë se kishin një “lidhje të veçantë” që nuk e kishte me askënd tjetër.
Sipas padisë, gjatë ndalesës së parë të turneut në Las Vegas në mars 2025, Joseph u akomodua në një dhomë hoteli të rezervuar nga ekipi i Smith. Ai pretendon se pas një prove, çanta e tij – ku ndodhej edhe karta e dhomës – mbeti për disa orë në një furgon të ekipit.
Kur u kthye në dhomë më vonë, Joseph thotë se gjeti shenja që dikush kishte hyrë pa leje. Ai raportoi menjëherë incidentin tek sigurimi i hotelit dhe policia lokale.
Në padi përmendet se në dhomë u gjet një shënim i shkruar me dorë me emrin e tij, si dhe sende personale që dyshohet se i përkisnin një personi tjetër, përfshirë ilaçe mjekësore dhe dokumente spitalore.
Joseph shprehet se u ndje i frikësuar për sigurinë e tij dhe kërkoi ndërrimin e dhomës.
Disa ditë më vonë, sipas pretendimeve, ekipi i Smith e fajësoi Joseph për incidentin dhe ai u pushua nga turneu. Në dokumente thuhet se më pas u punësua një violinist tjetër për të njëjtin rol, çka – sipas padisë – sugjeron se arsyeja e pushimit ishte e rreme.
Joseph pretendon se këto ngjarje i kanë shkaktuar dëme emocionale, humbje ekonomike, dëmtim të reputacionit, si dhe probleme serioze shëndetësore, përfshirë PTSD.
Padia e Joseph vjen në një kohë kur edhe bashkëshortja e Smith, Jada Pinkett Smith, është përfshirë në një proces tjetër ligjor, pas një padie prej 3 milionë dollarësh të ngritur nga një ish-bashkëpunëtor, i cili pretendon kërcënime dhe presion për nënshkrimin e një marrëveshjeje konfidencialiteti.
