Aktori i njohur Liev Schreiber është dërguar me urgjencë në spital pas një shqetësimi të pazakontë shëndetësor që e goditi të dielën, raportoi TMZ.
Aktori i “Ray Donovan” raportohet të ketë përjetuar një dhimbje koke të fortë, pas së cilës mjeku i tij i ka kërkuar menjëherë të paraqitet në spital.
Sipas burimeve, Schreiber ka kaluar natën në një spital në New York, ndërsa të hënën mjekët i kryen një sërë analizash.
Megjithëse ende nuk dihet shkaku i dhimbjes së papritur të kokës, burime për TMZ thanë se aftësia e aktorit për të ecur dhe folur nuk ishte prekur.
Ky nuk është episodi i parë i çuditshëm shëndetësor për aktorin. Schreiber ka treguar më herët se në vitin 2024 u diagnostikua me një gjendje të rrallë të quajtur amnezi globale e përkohshme, ndërsa ishte në Broadway me shfaqjen “Doubt: A Parable”.
Gjatë një interviste në “Late Night with Seth Meyers”, ai tregoi se gjithçka nisi me një dhimbje koke të fortë në dhomën e zhveshjes.
“Ndjeva që diçka nuk ishte aspak normale,” kujtoi aktori. Gjendja u përkeqësua kur ai nuk arriti të kujtonte emrin e bashkëpunëtores Amy Ryan dhe më pas harroi tërësisht tekstin e shfaqjes.
Ai u frikësua se po pësonte një goditje në tru, derisa mjekët e sqaruan se ishte një episod i përkohshëm, i cili zakonisht zhduket brenda 8–24 orësh.
Schreiber është i martuar me Taylor Neisen që nga viti 2023 dhe çifti ka një vajzë, Hazel. Ai ka edhe dy fëmijë të tjerë, Sasha (18) dhe Kai (16), nga marrëdhënia e mëparshme me aktoren Naomi Watts.
