Britney Spears ka reaguar ndaj akuzave tronditëse të ish-bashkëshortit Kevin Federline, të cilat janë bërë publike përmes kujtimeve të tij në librin e ri me titull “You Thought You Knew”, që publikohet më 21 tetor.
Sipas një deklarate të përfaqësuesve të Spears për People, “Kevin dhe të tjerët po përfitojnë sërish nga ajo, pikërisht pasi ka përfunduar pagesa e alimentacionit për fëmijët.”
Ata shtojnë se Spears është e përqendruar vetëm te mirëqenia e djemve të saj, Sean Preston (20) dhe Jayden James (19), dhe se ajo tashmë ka rrëfyer versionin e saj në autobiografinë “The Woman in Me”.
Në librin e tij, Federline pretendon se fëmijët e tyre nuk donin të qëndronin te Britney gjatë adoleshencës për shkak të sjelljes së saj “të çuditshme dhe shqetësuese”.
Në një fragment të publikuar nga The New York Times, ai shkruan: “Ata zgjoheshin natën dhe e shihnin duke qëndruar në derën e dhomës me një thikë në dorë, duke i parë në heshtje.” Më tej, ai përshkruan se Britney “kthehej pa thënë asgjë dhe largohej në heshtje”.
Federline gjithashtu shpreh shqetësime për gjendjen aktuale të këngëtares, duke thënë se ajo është "në një rrugë pa kthim" dhe se “diçka e keqe do të ndodhë nëse gjërat nuk ndryshojnë”.
Pas ndarjes në vitin 2007, Spears u detyrua të paguante fillimisht 20,000 dollarë në muaj për kujdesin e fëmijëve, e më pas 40,000 dollarë nga viti 2018, kur djemtë jetuan më shumë me babain në Hawaii. Ajo bëri pagesën e fundit në nëntor 2024, pasi djali më i vogël arriti moshën madhore.
Në libër, Federline shprehet se fushata Free Britney, që ndihmoi në përfundimin e kujdestarisë së saj 13-vjeçare në vitin 2021, “i bëri më shumë dëm se dobi”. “Tani kemi nevojë për një lëvizje të re: Save Britney,” shkruan ai. “Sepse kjo nuk ka më të bëjë me liri, por me mbijetesë.”
