Kim Kardashian ka folur pa doreza për jetën e saj romantike pas ndarjes nga Kanye West, në një intervistë të dhënë në podcastin Call Her Daddy të Alex Cooper, të transmetuar më 15 tetor.
Sipërmarrësja e përshkroi marrëdhënien me West si shpeshherë "toksike" dhe pranoi se pas divorcit nuk ka pasur më lidhje të tilla.
“Jam një person që fal shumë, dhe shpesh kujtoj vetëm gjërat e bukura. Por me kalimin e moshës, nuk e toleron më atë lloj sjelljeje. Thjesht nuk ke kohë,” u shpreh Kim.
Divorci i saj me reperin Kanye West u finalizua në nëntor 2022, pas martesës në vitin 2014. Pas ndarjes, marrëdhënia e saj më e njohur ka qenë me aktorin Pete Davidson, nga tetori 2021 deri në gusht 2022.
Në podcast, Kim foli edhe për fundin e martesës me West, duke pranuar se ndonëse pati shenja paralajmëruese, u përpoq të ishte mbështetëse gjatë momenteve të vështira, përfshirë edhe episodet e tij të shëndetit mendor.
“Kur fillova të ndjej se shëndeti im mendor po ndikohej, dhe nuk mund të isha më prind i pranishëm e i përqendruar, kuptova se dikush prej nesh duhej të merrte një hap mbrapa. Duhej të shpëtoja veten për të qenë një nënë më e mirë për të gjithë,” u shpreh Kim.
Ajo theksoi se mungesa e ndjesisë së sigurisë, emocionalisht dhe financiarisht, ishte ndër arsyet kryesore që e shtynë drejt ndarjes.
“Do të kthehesha në shtëpi dhe makinat ishin zhdukur – pesë Lamborghini. Ai ia kishte dhuruar miqve të tij. Thjesht nuk e dije çfarë të prisje kur të zgjoheshe në mëngjes, dhe kjo është shumë destabilizuese.”
Kim zbuloi se vajza e saj më e madhe, North, shpesh e shtyn që të gjejë sërish dashurinë. “Më tha: ‘Mami, duhet të martohesh. Je bërë shumë e madhe dhe askush nuk do të merret më me ty,’” tregoi ajo me humor.
Megjithatë, Kardashian nuk e konsideron marrëdhënien me Kanye West si dështim. “Një marrëdhënie mbi një dekadë me katër fëmijë të mrekullueshëm nuk është dështim,” tha ajo.
