Presidenti i Shteteve të Bashkuara tw Amerikës, Donald Trump, ka komentuar sërish mbi situatën humanitare në Rripin e Gazës, duke bërë thirrje për një zgjidhje të drejtpërdrejtë dhe pa kompromis.
“Mënyra më e shpejtë për t’i dhënë fund krizës humanitare në Gaza është që Hamasi të dorëzohet dhe të lirojë pengjet”, shkroi Trump në një postim të bërë të enjten në rrjetet sociale.
Ndërkohë, i dërguari special i SHBA-së, Steve Witkoff, po zhvillon një takim sot me kryeministrin izraelit Benjamin Netanyahu në Jerusalem, raporton CNN.
Lexo më tej: Analiza/ Izraeli po izolohet ndërkombëtarisht, edhe aleatëve po i soset durimi
Witkoff mbërriti në Izrael të enjten, një javë pasi SHBA-të u tërhoqën nga bisedimet për armëpushim në Gaza, duke akuzuar Hamasin për “besim të keq” në negociata.
Kriza humanitare në Gaza është përshkallëzuar, me mungesë të theksuar të ndihmave, energjisë dhe shërbimeve mjekësore.
Përplasjet ushtarake mes Izraelit dhe Hamasit kanë vazhduar me intensitet, ndërsa përpjekjet ndërkombëtare për një armëpushim të qëndrueshëm nuk kanë dhënë rezultate konkrete deri më tani.
Qindra civilë mbeten të zhvendosur, dhe një numër i panjohur pengjesh ende mbahet nga Hamasi që prej shpërthimit të konfliktit.
