Sabrina Carpenter ka folur për herë të rrallë rreth jetës së saj private dhe sfidave që përballet si një këngëtare në qendër të vëmendjes.
Në një intervistë të re për Rolling Stone, Sabrina tregoi se sa e vështirë është të përballesh me një ndarje kur gjithë bota ka diçka për të thënë.
“Je në fazën kur thua: ‘Kjo nuk ndodhi atëherë. Kjo ndodhi. Po ju mungojnë disa detaje kyçe,’” u shpreh 26-vjeçarja. “Njerëzit e nënvlerësojnë sa e ndërlikuar është të jesh një grua e re, të kesh marrëdhënie dhe të përballesh me një turmë të tërë të panjohurish që kanë opinione mbi to.”
Sabrina ishte në një lidhje të përfolur me aktorin irlandez Barry Keoghan. Lidhja e tyre përfundoi në dhjetor 2024, me burime që thoshin se “të dy janë të rinj dhe të fokusuar në karrierë.”
Pas ndarjes, nisën spekulimet se Keoghan mund ta kishte tradhtuar këngëtaren, veçanërisht pasi influencuesja Breckie Hill publikoi disa postime të dyshimta në rrjetet sociale që lanë të kuptohej se ishte në të njëjtat vende me aktorin në të njëjtën kohë.
Për shkak të presionit të madh dhe komenteve negative, Keoghan madje pezulloi llogarinë e tij në Instagram. Ai më pas reagoi, duke kërkuar që njerëzit të mos përfshinin djalin e tij të vogël, Brando, në mes të këtij kaosi.
“Ju lutem, kujtoni që djali im do t’i lexojë të gjitha këto për babain e tij kur të rritet. Tregoni respekt,” shkroi ai në X (ish-Twitter).
Nga ana e saj, Breckie mohoi çdo përfshirje, duke thënë se nuk e ka takuar kurrë Barry-n dhe vetëm e ka parë në televizor. Sabrina nuk komentoi publikisht, duke u fokusuar te projektet muzikore.
E pyetur për statusin e saj aktual, Carpenter u përgjigj:
“Jam duke bërë gjënë tipike të një 25-vjeçareje, çfarëdo që të thotë kjo.”
