Shtëpia e reperit të njohur Macklemore në Seattle është grabitur gjatë fundjavës, ndërsa tre fëmijët e tij ishin duke fjetur në dhomat e tyre.
Sipas një raporti të publikuar nga Departamenti i Policisë së Seattle (SPD) dhe ndarë me The Post, incidenti ndodhi pak para orës 1 të mëngjesit, më 7 qershor (e shtunë).
Një grua që u identifikua si dadoja e fëmijëve raportoi ngjarjen në orën 00:48 të mëngjesit, duke deklaruar se dy burra kishin hyrë në shtëpi dhe e kishin sulmuar me spraj.
Adresa e përmendur në raport përputhet me atë të Ben Haggerty, emri i vërtetë i Macklemore, sipas The Seattle Times. Në një pjesë të raportit përmendej gjithashtu emri “Davis”, mbiemri i bashkëshortes së reperit, Tricia Davis.
Çifti, të dy 41 vjeç, kanë tre fëmijë: Sloane (10), Colette (7) dhe Hugo (3).
“Ajo [dadoja] arriti të largohej, por tre fëmijët ishin ende brenda në gjumë,” thuhet në raportin policor. “Ajo shtoi gjithashtu se shtëpia i përkiste një personi të njohur publik dhe besonte se krimi mund të kishte motiv politik.”
Macklemore ka qenë një zë i fuqishëm në mbështetje të Palestinës gjatë konfliktit në Gaza, duke ndarë postime të gjata kundër dhunës dhe duke kritikuar artistët që heshtin. Në shtator, ai u përjashtua nga një festival muzikor pasi në një event bamirësie në Seattle bëri thirrje: “F–k America”.
Sipas dëshmisë së dado-s, dy burrat hynë përmes derës së verandës pranë një zyre, e sulmuan me spraj dhe i thanë: “Ku janë bizhuteritë, k**vë?!”
Ajo tregoi se i çoi në dhomën kryesore, ku grabitësit kontrolluan sirtarët, dollapët dhe morën rroba, bizhuteri e këpucë, duke shkaktuar rrëmujë në të gjithë shtëpinë. Sipas policisë, janë vjedhur mijëra dollarë pasuri personale.
Dadoja u rrëzua dhe u sulmua fizikisht, por arriti të shpëtojë duke kafshuar dorën e njërit prej agresorëve, dhe doli nga banjoja për të kërkuar ndihmë nëpër lagje.
