Tre persona janë shoqëruar nga policia pas incidentit në një zyrë elektorale të padeklaruar të Partisë Socialiste, pranë zonës së ish-Bllokut, e cila pretendohet nga deputeti Erion Braçe si “zyra e tij personale”.
Pamjet e publikuara nga Partia Demokratike tregojnë njerëz që largohen me nxitim nga ambienti ku, sipas PD-së, janë kapur materiale komprometuese për manipulim votash.
Sipas opozitës është dokumentuar një "krim zgjedhor", ku përfaqësues të administratës shtetërore dyshohet se kanë poseduar në mënyrë të paligjshme materiale zgjedhore, pajisje elektronike dhe shuma parash të dyshuara për blerje votash.
https://lapsi.al/2025/05/11/video-patronazhistet-ja-fusin-vrapit-brace-perplaset-me-gazetaren/
PD thotë se tre përfaqësues të saj kanë njoftuar menjëherë Policinë e Shtetit, por kjo e fundit ka mbërritur në vendngjarje me një vonesë prej mbi 90 minutash, duke u dhënë sipas saj “kohën e nevojshme për të zhdukur provat e krimit elektoral”.
“Narkoregjimi i Edi Ramës dëshmoi edhe një herë fytyrën e tij,” thuhet në deklaratën e Partisë Demokratike, që akuzon qeverinë për përdorim të strukturave shtetërore në funksion të manipulimit të votës më 11 maj.
