Vetëm pak ditë përpara zgjedhjeve të 11 majit, Kryeministri dhe kryetari i Partisë Socialiste, Edi Rama është përpjekur ta kthejë një copë mbulesë tavoline në një akt politik. Gjatë një takimi në fshatin Kuç të Vlorës, ai ka bërë publik parashikimin e tij për rezultatin zgjedhor, duke e quajtur atë me pompozitet “Memorandumi i Kuçit”.
Në këtë “dokument”, të firmosur në një nga lokalet e fshatit, Rama shkruan se është i sigurt 100% që PS do të marrë të paktën 78 mandate, ndërsa lë një mundësi 50% për të shkuar deri në 88 deputetë – një shifër që do t’i garantonte një supermazhorancë në Kuvend.
Për më tepër, ai pranon me bindje të plotë se do të marrë një deputet më shumë në Dibër, Elbasan, Fier dhe Shkodër, ku Partia Socialiste do të dalë më mirë se në zgjedhjet e vitit 2021, kur arriti në total 74 mandate.
Ky parashikim optimist për socialistët përkon me klimën e tensionuar që shoqëron zgjedhjet e 11 majit, ku fushatës i kanë paraprirë skandale si inceneratorëve, tuneli i Llogarasë, bashkëpunimi me bandat dhe arrestimet e bujshme të bashkëpuntorëve të Ramës.
