Partia Mundësia çeli zyrtarisht fushatën elektorale për zgjedhjet parlamentare të 11 Majit këtë të premte, me takimin e parë në Shkodër, pjesë e një turi nga Shkodra në Sarandë në 10 qytete.
Në fjalën e tij, kryetari i Partisë Mundësia, Agron Shehaj u shpreh se gjatë gjithë kësaj periudhe, në takimet në terren, ka gjetur mbështetje dhe pëlqyeshmëri nga qytetarët për programin e forcës politike që ai drejton. Kjo, tha ai për arsyen sepse shqiptarët në këto zgjedhje duan dhe presin ndryshimin e qeverisjes së vendit.
“Sot vendoset fati i Shqipërisë, do vendoset nëse do vazhdojmë të qeverisemi nga një qeveri që mendon për një grup njerëzish, të largojnë shqiptarët të mbajnë peng e të mos lejojnë njerëzit si ty e si bashkëshortja jote të kenë mundësi t’ja dalin pa nevojën e lidhjeve politike apo pazareve” i tha Shehaj një qytetari i cili e pyeti:
“Si mund ta ndryshojmë këtë sistem?”
Shehaj: Duke mos bërë asgjë, e duke u futur në garë pasi të mbarojë gara e sigurt që nuk ndryshon gjë. Ndryshon duke besuar në projektin politik që ne kemi filluar, jo duke na mbështetur ne, duke mbështetur ndryshimin, nuk mund të vazhdojmë edhe pas 35 vitesh me të njëjtët njerëz, me të njëjtën politikë, me të njëjtat premtime, me të njëjtat gënjeshtra. Po nuk reaguam, po nuk punuam, nuk ndryshon gjë.
Të gjithë ne e kemi nisur në jetë nga hiçi. Mos u merr me politikë, është e sigurt që merret politika me ty. Më besoni, mungon 1 muaj thuajse nga zgjedhjet, 1 muaj nuk është pak. Ne për fatin e mirë kemi mbështetje dhe një pëlqyeshmëri shumë të lartë. Sepse realisht shqiptarët duan ndryshimin dhe ne jemi e vetmja forcë politike që ndryshojmë nga partitë e vjetra dhe ndryshojmë dhe nga partitë e reja që duken sikur janë të reja por me aq pushtet sa kanë pasur janë sjellë më keq se të vjetrat.
Më tej Shehaj u bëri thirrje qytetarëve që më 11 maj të votojnë për ndryshimin dhe premtoi se do të rikthehet sërish në Shkodër për të bërë prezantimin zyrtar të kandidatëve të Partisë Mundësia.
Në largim nga qyteti i Shkodrës, Agron Shehaj u ul vetë në timonin e autobusit me te cilin do përshkojnë Shqipërinë këtë të premte nga Shkodra në Sarandë.
“Shihemi në Lezhë, jeni në duar të sigurta” u shpreh Shehaj.
Turi i çeljes së fushatës së Partisë Mundësia do të transmetohet live për 12 orë në kanalin në Youtube të kryetarit Agron Shehaj dhe të gjitha rrjetet e tij sociale.
