Dashuria mes Manchester United dhe Ronaldos është një kujtim i largët. Rikthimi i portugezit te Djajtë e Kuq nuk e rindezi kurrë flakën e pasionit. E pas kërkesave për shitje, mosmarrëveshjeve me ten Hag dhe vendimit të trajnerit për ta nxjerrë jashtë skuadrës shpërthen një cështje e re. Nuk ka më refuzim të CR7 për tu futur në fushë, por fjalë të thëna nga ai që do të publikohen në një libër. Në faqet e këtij libri, Ronaldo ka diskredituar Manchester United dhe shokët e tij të skuadrës.
Disa tabloidë të rëndësishëm anglezë si The Sun kanë publikuar disa pjesë nga libri. Ata janë fokusuar te rivaliteti mes Messi e Ronaldo. Por nuk ka mbetur jashtë vëmendjes edhe një episod ku Ronaldo nuk ka qenë i butë në kritikat ndaj klubit aktual dhe bashkëlojtarëve.
Lexo më tej: “Ronaldo refuzoi të futjen në fushë”: Ten Hag sqaron ngjarjen dhe e degdis të stërvitet me të rinjtë
Ronaldo e quajti kthimin e tij në Manchester United "katastrofik". Një transferim që e ka bërë "të pakënaqur dhe të frustruar" për bashkëjetesën e tij të ndërlikuar me Rangnick. CR7 ka patur rezreva edhe për menaxhimin e Djajve të Kuq, gjatë një bisede me një drejtues në një ngjarje të FIFA-s.
Sipas portugezit, në fakt, shoqëria angleze nuk ka evoluar në krahasim me përvojën e tij të parë në vitin 2009. Kjo edhe për sa i përket ambienteve stërvitore. Jo vetëm kaq, por edhe nga pikëpamja teknike. Në fjalët e Ronaldos kanë përfunduar në shënjestër shokët e skuadrës. CR7 nuk i ka konsideruar në lartësinë e duhur as nga pikëpamja fizike.
