Video/ Me tre ujq me zinxhirë, Diego Costa prezantohet te Wolves: “Kur më nuhatën këmbën, mbarova!”

Wolverhampton ka njoftuar nënshkrimin deri në fund të sezonit me Diego Costa, një sulmues brazilian me përvojë, por me nënshtetësi spanjolle me një të kaluar të lavdishme te Atlètico Madrid dhe Chelsea ndër të tjera. 33-vjeçari, i lirë nga janari i kaluar pas përfundimit të kontratës me Atletico Mineiron, do t'i ndihmojë Wolves të kompensojnë mungesën e Sasa Kalajdzic, sulmuesi austriak që erdhi në verë nga Stuttgart për gati 20 milionë euro e që pësoi menjëherë këputjen e ligamentit të kryqëzuar. E klubi anglez e ka parë të arsyeshme të njoftojë ardhjen e fundit me një video mjaft unike... Në videon me të cilën Wolverhampton njoftoi ardhjen e tij në rrjetet sociale, shihet Diego Costa në korridoret e errëta të stadiumit Molineux që, i veshur me fanellën e re, mban lidhur me zinxhirë të rëndë tre ujq hungërritës. Në fund të klipit shfaqet një shkrim elokuent: “Diego Costa është një ujk”, padyshim që i referohet pseudonimit të klubit, Wolves (Ujqit). Një video mjaft e veçantë, nga e cila megjithatë ish-Chelsea dhe Atlètico Madrid nuk pati shumë kënaqësi në xhirime, siç u shpreh ai vetë për kanalet zyrtare të klubit. Sulmuesi ka pranuar se mendonte se përvoja e xhirimeve me ujqit mund të ishte "e bukur", por në fakt nuk ishte shumë e këndshme: "Isha i frikësuar për vdekje. E mbaja atë zinxhir dhe vazhdova të mendoja 'Po sikur një nga këta ujqër të hidhet mbi mua? E po sikur edhe dy të tjerët të bëjnë të njëjtën gjë? 'Sepse trajnerja i thërriste vazhdimisht, duke u kërkuar të lëviznin pak, por ata nuk bënë asnjë gjë nga ajo që ajo i urdhëroi. E pastaj mendova 'Nëse ata nuk e dëgjojnë trajneren...'. Pastaj kur nuhatën këmbën time, e kuptova se kisha mbaruar”. Më pas Diego Costa e përfundoi pasditen e tij të këndshme të xhirimeve: “Patjetër që isha i frikësuar. Ata ishin ujqër, jo qen. Ishte një përvojë interesante, por jo shumë komode. Unë kam pesë qen, por ata nuk janë ujq!”.

It's official. ✍️ pic.twitter.com/FXcgReSlsr

— Wolves (@Wolves) September 12, 2022