Një 31-vjeçar i quajtur Ardit Kërtusha u plagos në këmbë këtë të hënë në Durrës. Ai ishte ulur në një lokal bashkë me disa persona të tjerë në momentin kur u qëllua. Në njoftimin e parë që dha për ngjarjen, policia tha se shkak i plagosjes ishte një sherr i castit mes disa personave “për motive të dobëta”.
Megjithëse dha versionin e “motiveve të dobëta”, policia shtoi “grupi hetimor ndodhet në vendngjarje dhe po punon për sqarimin e plotë të rrethanave të ngjarjes”.
Por vetë i plagosuri dha një version tjetër të ngjarjes.
Sipas tij, plagosja nuk ishte për motive të dobëta, por një atentat nga vrasës me pagesë. Kërtusha akuzoi policinë se shpërndau një mjegullnajë me njoftimin që dha.
“Është e paqartë se përse Policia e Durrësit nxitoi të shpërndante një mjegullnajë për dinamikën e ngjarjes, duke e konsideruar si një “konflikt të çastit”. Ishte atentat nga vrasës me pagesë”- deklaroi Kërtusha për abc.
Ai madje shpjegoi detaje nga atentati, që krijojnë një dinamikë krejt tjetër nga versioni i policisë.
“Nga jashtë lokalit ka ardhur një djalë i ri, i cili mbante në fytyrë një maskë anti-covid, me syze të errëta dhe kapele në kokë. Sapo është afruar tek tavolina ku isha, atentatori ka nxjerrë një pistoletë dhe qëlloi në drejtimin tim. Por, pistoleta u bllokua pasi ka qëlluar vetëm 1 herë, ndërsa atentatori futi dorën në një çantë që mbante me vete, nga ku nxori një pistoletë të dytë. Unë u largova me shpejtësi sapo pash që pistoleta u bllokua. Ai më ndoqi dhe qëlloi edhe dy herë të tjera. Një prej plumbave më kapi në këmbë. Nuk ka qenë sherr banal, tentuan të më bënin atentat nga vrasës me pagesë. Personi qëlloi katër herë por iu bllokua pistoleta. Një prej plumbave më kapi në këmbë” është shprehur Kërtusha.
Kërtusha u dërgua në spitalin e Traumës, ku po merr ndihmën e nevojshme mjekësore, ndërsa nga autori nuk ka ende asnjë gjurmë.
31 vjeçari është pjesë e Partisë Socialiste prej shumë vitesh. Madje disa vite më parë, ai ka kandiduar për kreun e Partisë Socialiste, dega Durrës, duke sfiduar Vangjush Dakon. Përplasja mes tij drejtuesve të lartë socialistëve në Durrës nisi në tetor të vitit 2019, kur ai shprehu dëshirën për të kandiduar për kryetar i PS në zgjedhjet që u mbajtën në Janar, 2020.
Partia Socialiste prej disa ditësh është e përfshirë nga një fushatë e brendshme për kryetarët e degëve të partisë në të gjithë vendin. Kryetarët do të zgjidhen nga asambletë dhe nuk do të votohen nga anëtarësia./Lapsi.al
