Lulzim Basha lexoi me shpejtësi fjalimin e dorëheqjes para deputetëve dhe kryetarëve të degëve të PD-së për t’u larguar më pas në këmbë nga selia blu. Me daljen nga zyra, Basha kënaq jo vetëm deputetët që i dhanë ultimatum, por edhe shuan zërat nga opinioni publik që kërkonin me ngulm dorëheqjen pas humbjes së 6 Marsit.
Por mënyra se si e dha dorëheqjen la pas dyshime se Basha po luan një lojë, me anë të së cilës fiton kohë dhe rikthehet sërish në krye të PD-së. I pari që e artikuloi këtë ishte deputeti Ervin Salianji, i cili e quajti dorëheqjen një “truk” pas mbledhjes së grupit parlamentar.
Duke shpjeguar shenjat nëpërmjet të cilave ai lexon këtë truk, Salianji tha: “Sepse në përgjigje të pyetjes së një prej antarëve të Kryesisë që e pyeti, nëse kjo ishte një dorëheqje përfundimtare dhe disa pyetje të tjera, (Basha) nuk kishte një qëndrim të qartë dhe fakti që lihet mundësia apo aludohet që një vit Partia Demokratike do të vazhdojë në këtë gjendje deri në zgjedhjet lokale pa pasur një qëndrim të qartë, pa grup pune, pa dakortësinë e grupit, por vetëm duke e anonçuar pa u konsultuar me institucione, mendoj se mund të jetë një truk”.
Në fakt, forma me të cilën u largua Basha lë hapësirë për dyshime, për shkak të disa lëvizjeje të shpejta që pasuan dhe që e mbajnë PD nën kontrollin e rrethit të ngushtë të besnikëve të Bashës.
E tillë ishte rezoluta që doli brenda pak minutash nga PD, ku binte në sy kërkesa për të larguar Sali Berishën me të njëjtën arsye që dha Basha kur e pezulloi atë, pra; shpallja non grata nga SHBA.
Rezoluta u lexua në emër të grupit parlamentar, megjithëse aty mungonin një pjesë e mirë e deputetëve.
Me të njëjtin nxitim, erdhi caktimi i drejtimit të ri të PD-së në duart e Enkelejd Alibeajt, që përveçse drejton Fierin, Shkodrën, grupin parlamentar, tani do të drejtojë edhe partinë. Ishte sekretari i përgjithshëm i PD-së, Gazment Bardhi që njoftoi se Jorida Tabaku kishte refuzuar drejtimin, ofertë të cilën e kishte pranuar Enkelejd Alibeaj.
Me dorëheqjen e kësaj të hëne, Lulzim Basha ngriti shumë dyshime, ndërsa qëndron me njërën këmbë jashtë dhe me një tjetër brenda selisë së PD-së, duke mbajtur gjallë përçarjen brenda të djathtëve.
Në ikje, Basha u ndal në një restorant për të darkuar me kryetarët e degëve, të cilët e kishin kundërshtuar dorëheqjen e tij. Rrethimi nga grupi i besnikëve, ngjan me një shfaqje force, pas së cilës dorëheqja mbetet ende për t’u provuar./Lapsi.al
