Gjithcka nis me Tiranën kampione dimri në derbin e fituar të kryeqytetit e me imazhin e Michael Ngo’o me gjurin në akull, i dëmtuar pas një tentative për të shënuar në portën e Teqjas. Tirana që kërkon të përforcohet për 2022 ka marrë dhuratën më të bukur me fitoren ndaj Partizanit, por të pasuar me atë më të keqin të mundshëm, me anglezin jashtë lojërave për 2-3 muaj. Praktikisht sulmuesi pritet të rikthehet në mars, gjë që penalizon shumë bardheblutë. Kështu, me Shehin që po orienton merkaton, nevojat emergjente janë në sulm. Dy më saktë, sepse duhet zëvendësuar Ngo’o e duhet një lojtarë më ekspert se Gjumsi e Beqiraj.
Sipas asaj që mësohet vëzhgimi i trajnerit është përqednruar në merkaton e huaj, por deri tani janë parë vetëm profile, pa ndërtuar asnjë negociatë. Duket sikur gjithcka tjetër është e sigurtë te Tirana, që mbrojtjen e titullit dimëror do ta nisë me sulm, por në anën tjetër rreziku i një largimi të fortë ku sirenat kanë kohë që bien te Ismajlgeci do ta bëjnë që Shehi të përjetojë një janar makth, me rrezikun e largimit të një prej pedinave më të rëndësishme.
Sipas asaj që filtron nga klubi, nuk ka asnjë ofertë zyrtare, por të interesuarit nuk mungojnë dhe Tirana nuk është se nuk ka nevojë për likuiditet. Kështu, një vigjilje fundviti e cuditshme për Shehin, që ka lënë 8 lojtarët e huaj të kalojë festat në shtëpi, por me një program individual, ndërsa të tjerët i ka në forcë deri në 29 dhjetor, për ti lënë një pauzë të shkurtër, deri në rithirrjen e 3 janarit, për një vit të ri në ndjekje të titullit…
