Portieri Teqja është bërë protagonist dhe forma e tij jo vetëm po ndihmon Partizanin të kthehet në hapat e tij, por njëkohësisht e ka ndaluar ish-skuadrën e tij të marrë një barazim në fund të ndeshjes, duke pritur penalltinë e Meksit si një hakmarrje të kohëve kur e mbanin në stol. Partizani ka siguruar fitoren e dytë radhazi në kampionat për herë të parë në këtë sezon, duke mposhtur me shifrat 2-1 Skënderbeun në një sfidë ku ka pasur gjithçka.
Një ndeshje e hapur me të dyja skuadrat që kërkonin suksesin, në emergjencë pikësh, gjë që prodhoi raste të shumta e gola që në pjesën e parë. Golit të shpejtë të Rrapajt iu përgjigj në të njëjtën mënyrë Mensah, por hallet e Dajës i zgjidh i përhershmi Cara. Në fundin pjesës së parë sulmuesi realizoi, por ishte VAR që ktheu vendimin e asistentit, që kishte sinjalizuar pozicion jashtë loje, duke sjellë edhe polemikat e para.
Pjesa e dytë nisi më qetë por gjithcka ishte rezervuar në fund. Me Partizanin që mbrohej në kërkim të një mbrojtje të rezultatit të cmuar, korçarëve iu anulua goli i barazimit për një prekje me dorë të Zhan Viktor. Nëse VAR aprovoi vendimin e arbitrit, në minutën e 82 erdhi edhe pika më delikate, kur u akordua një penallti, që mund të vlente barazimin. Teqja është i pakalueshëm për Meksin, duke mbrojtur fitoren e dytë të të tijve.
Dueli vazhdoi me drithërima deri në fund dhe u mbyll me protestat e korçarëve ndaj gjyqtarit, teksa shohin veten përsëri në zonën e ftohtë të klasifikimit. Ndërsa të kuqtë tani shohin shumë afër zonën e Europës, vetëm 2 pikë larg.
