“Jam dakord që është fitore e vuajtur se është fitore karakteri, sidomos të përmbysësh me Teutën që mbrohet mirë në fund, për më tepër kur je në disavantazh. Tregon që lojtarët luftojmë për këtë fitore dhe besuan deri në fund duke ia arritur". Ilir Daja, pas fitores së minutave shtesë kundër Teutës, që është një melhelm për plagët e këtij sezoni të Partizanit, që të paktën distancohet nga zona e rënies nga kategoria, ka nxjerrë edhe dufin kundër kritikave pafund të marra mbi performancën e rezultatet e ekipit të tij. "Jam shumë i kënaqur nga paraqitja se kur kemi luajtur mirë nuk kemi marrë rezultate, e asnjë nuk tha që luajti Partizani mirë, por të gjithë thanë që ka pasur krizë rezultatesh, që është e vërtetë. Ndaj po të vazhdojmë kështu e të marrim tre pikët, do të isha dakord".
Tekniku i është kthyer më pas teorisë së tij të përhershme të mungesës së fatit, duke bërë një krahasim mes dy ndeshjeve të luajtura kundër kampionëve në fuqi të Teutës: "Nuk merrem me sezonin e kaluar, por në ndeshjen e hapjes me Teutën në fazën e parë ku kemi shënuar një gol vetë dhe kemi humbur penallti që do të thotë fati edhe nuk ka qenë me ne. Ndërsa sot përtej sakrificës edhe fati ishte me ne, se në përmbysje në fund edhe fati është faktor. Shpresojmë që të jetë sinjal i mirë për fazën e dytë, por duhet fitore për të rikuperuar pikët dhe pozicionin në tabelën e klasifikimit".
Në fund edhe një fjalë për tifozët që vazhdojnë të kontestojnë skuadrën, të pakënaqur nga ajo që kanë parë në 10 javët e para të kampionatit: "Tifozët kanë të drejtë se në rastin e fitoreve të munguar e pikëve të munguara, sigurisht kanë të drejtën të protestojnë brenda rregullave. Nuk kanë bërë asgjë jashtë rregullave. Kështu që atë që kemi bërë keq, na del për detyrë ta rikuperojmë që të jetë një mirëkuptim më i madh mes tifozëve dhe grupit të lojtarëve”, e mbylli Daja.
