Andi Bushati: Ramizmi si debilizim i shoqërisë
Po pyetja që shtrohet kur sheh këto qëndrime diametralisht të kundërta të kryeministrit është: A po bën ai thjesht një diversion, apo kjo ka të bëjë edhe me një pakt të heshtur të ofruar vetë nga PD-ja. Përgjigjja që u dha nga Partia Demokratike e lë të hapur versionin e dytë. Sepse ajo hedh poshtë si shantazh deklarata e Ramës por nuk thotë asnjë fjalë për shkarkimin skandaloz të presidentit. “Edi Rama është autori i masakrës elektorale dhe tjetërsimit të vullnetit të shqiptarëve për ndryshim. Me qëllim që të largojë vëmendjen ai vazhdon gënjeshtrat, manipulimet dhe diversionet. Vjedhja e zgjedhjeve nga Rama-Doshi-Rakipi e çuan vendin tonë drejt një masakre masive elektorale, ku viktimat janë qytetarët shqiptarë dhe e ardhmja e tyre”, thuhet në reagimin e PD-së ku shtohet: "Asnjë diversion nuk do të na ndalë në këtë betejë, duke filluar me shpalosjen e fakteve, provave dhe të dhënave që dëshmojnë përmasën e plotë të masakrës zgjedhore nga regjimi Rama-Doshi-Rakipi”. E pra nuk është e lehtë të dallohet në qëndrimin e PD-së se ndonëse ata hedhin poshtë bashkëpunimin me kryeministrin e masakrës elektorale, nuk gjejnë kurajo ti thonë jo zgjedhjes së përbashkët të një presidenti të parakohshëm apo farsës morale dhe kushtetuese që ka nisur rilindja. Po të shihet qëndrimi zyrtar i PD, ai nuk ngjan aspak as me mendimin e liderit historik të saj Sali Berisha, i cili e etiketon nismën e dytë të shkarkimit të Metës si "grusht shteti" dhe "proces antikushtetues"."Në këtë proces ai, duke shkelur në mënyrë flagrante parimet themelore të kushtetutës dhe disa nene të saj, kërkon të rrafshojë dhe institucionin e fundit që nuk kontrollon në Shqipëri dhe të vendosë pushtetin e tij absolut të bazuar mbi krimin, drogën dhe vjedhjen e korrupsionin" ka shkruar Berisha.
Kuptohet thjeshtë se qëndrimi i Bashës është shumë larg atij të papaardhësit të tij. Dhe kjo natyrisht i jep dorë Ramës që të bëjë diversion me ata që pasi i grabiti, tani po i tall edhe publikisht.
©Lapsi.al
