"Për mua, çdo gjë mund të ndodhë, Bayern është skuadra më e mirë në botë tani. Unë kam një respekt të jashtëzakonshëm. Në të njëjtën kohë ne kemi besim në pikat tona të forta dhe e dimë se duhet të mendojmë për ta fituar këtë ndeshje". Kështu, trajneri i PSG Mauricio Pochettino, duke folur në një konferencë shtypi, në prag të ndeshjes së kthimit të çerekfinaleve të Ligës së Kampionëve kundër Bayern Munchen, ka lënë të hapur cështjen e kualifikimit, pavarësisht fitores në Mynih nga të besuarit e tij.
Trajneri argjentinas, më pas, bëri një vlerësim të mundësisë për të aktivizuar dy lojtarët e kombëtares italiane Marco Verratti dhe Alessandro Florenzi, që sapo janë kthyer nga Covid, me të cilin u infektuan në grumbullimin e fundit. "Do të jetë e vështirë për Marcon ta fillojë nga minuta e parë. Për Alessandron është më e mundur", tha Pochettino i cili gjithashtu konfirmoi se Mauro Icardi është i dëmtuar dhe "nuk do të jetë atje".
