Ndonëse e ka pasur për 5 vite njërin nga anëtarët më të rëndësishëm të kabinetit Edi Rama po e fut edhe Ditmir Bushatin mes kazanëve të shumtë kundër tij, ashtu siç i etiketon ai ata që guxojnë të mos mendojnë si ai.
I gjithë problemi ka lindur pas bisedës së kryeministrit me një biznesmen të fasonerisë në Shkodër të cilit Rama i tha se është më mirë të marrë punonjës nga Bangladeshi dhe ti heqë ata nga puna kur fillojnë të mësojnë shqip.
Kjo e detyroi ministrin e jashtëm të reagojë në Facebook. "Para se t’i përkufizojmë shqiptarët si ‘thashethemexhinj’ e ‘dembelë’, duhet të pyesim veten a mbajmë ndopak përgjegjësi për strukturën e ekonomisë shqiptare dhe modelin zhvillimor që ndjekim". Duke u nisur nga një këndvështrim tejet social që këmbëngul se një sipërmarës nuk mund të krijojë mirqënie pa kohezion me punonjësit e tij ai shkruajti: "Nuk ka sesi të vij zgjidhja magjike përmes zëvendësimit të shqiptarëve që ikin drejt veriut të Europës dhe Amerikës me bangladeshas, afgan dhe indian, meqë këta të fundit nuk paskan ‘pretendime’. Në fakt, në të dy rastet bëhet fjalë për njerëz dhe jo robot"!
Por i pyetur për gafën e tij me punëtorët nga Bangladeshi dhe për komentin që bëri ish ministri i jashtëm për të, Rama e humbi toruan. Ai iu drejtua moderatores Eni Vasili: “Lerë tani mos na bëj këto muhabete. Do bëjmë muhabet serioz apo jo. Ku kupton Ditmir Bushati nga struktura e ekonomisë shqiptare. Ai është brenda nesh, po nuk do të thotë se kupton nga struktura e ekonomisë shqiptare. Ke këta më mirë (për gazetarët në studio). Edhe Arjoni që kupton më shumë ekonomi nuk flet për këto”, tha Rama në “Open”.
Në fakt, gafa e Ramës që shqiptarët duhen zëvëndësuar me puntorët bangladeshës që nuk dinë as gjuhën as kanë pretendime demokratike ka ngjallur shumë reagime, njësoj si me thirrjen që ai i bëri sipërmarësve italianë që u tha: "Ejani këtu se këtu s'ka sindikata".
Por, në vend që të bëjë prapa ktheu, Rama fillon e sulmon ata që kanë një këndvështrim të ndryshëm nga i tiji. Këtë herë qe radha e Ditmir Bushatit që u cilësua si njeri jo serioz dhe që nuk kupton.
©Lapsi.al
