Tre ditë nga rënia e zjarrit në magazinën e katit të nëndheshëm të qendrës tregtare Casa Italia, janë shuar shpresat e familjarëve që Arian Sala mund të jetë gjallë. Punonjësi i sigurisë, 33 vjeç, baba i një fëmije, ka mbetur mes flakëve dhe zjarrëfikësit nuk mundën ta shpëtojnë.
Dëshmitarët treguan se kur Arian Salën e kishin lajmëruar se në magazinë kishte rënë zjarri, ai ishte futur aty dhe kishte ndihmuar 25 punonjës të tjerë të dilnin jashtë. Dyshohet se u rikthye sërish, në një përpjekje fatale për të shpëtuar të tjerë punonjës, por mbeti i bllokuar.
Prej disa ditësh zjarrëfikësit kanë luftuar me flakët në përpjekje për të vënë nën kontroll zjarrin, por e kanë pasur të pamundur të futen brenda për shkak të tymit dhe të materialeve që digjen.
Në ditën e tretë, në magazinën që digjet, mbërriti shërbimi zjarrëfikës i aeroportit të Rinasit. Shefi i tyre Adem Statovci tha se ata kishin një pajisje të veçantë për të luftuar me zjarrin.
“Pajisja që ne kemi ofruar mundëson frymëmarrjen e vazhdueshme pa cilindra në shpinë. Dhe ajo bën të mundur që zjarrëfikësi t’i ketë duart e lira për të fikur zjarrin dhe për të bërë kërkim-shpëtimin. Deri ku kemi arritur ne, temperatura shkon në 980 gradë celsius”, tha ai, ndërsa familjarët prisnin me ankth jashtë perimetrit të sigurisë.
Për dy ditë e dy netë, xhaxhai i Arian Salës u lut që institucionet shtetërore t’i vinin në ndihmë nipit. Tashmë që zjarrfikësit kanë një pajisje më të fuqishme pwr tw punuar, shpresat janë të pakta se 33-vjeçari do të jetë gjallë. Me lot në sy, xhaxhai i tij tregoi se zjarrfikësit e Tiranës nuk i kishin pajisjet e duhura, megjithëse ata u përpoqën ta shpëtonin nipin e tij. Ndërsa kamerat filmonin, ai komunikoi me një prej zjarrfikësit e Tiranës, duke i shpjeguar se përse Ariani nuk u ndihmua në momentin e parë, por u la mes flakëve.
“Eshtë mungesa e pajisjeve. Që në momentin e parë që ka ardhur zjarrfikësja e parë me katër apo pesë veta, ato futeshin dy e nga dy, me një bombul 3-litroshe që mbante vetëm 4 minuta. “Tetë minuta, më thoshte, kam kohë. Katër me shku e me ardhë”. Por me 4 minuta unë nuk arrij dot deri aty e jo më deri atje ku ishte personi. Një veshje anti-zjarr nuk e kishin ato njerëz atë natë. Një bombul, nga ato me kavot që duron deri në 300 gradë, nuk e kishin atë natë. Erdhën dje (pajisjet) nga ora 3, se unë këtu kam ndenjur. A nuk është gjynah? Se çuni sot do ishte gjallë. Sepse vatra e zjarrit nuk ka marrë ato përmasa atë natë, kur çuni ishte brenda” ishin fjalët e xhaxhait të Arian Salës.
Zjarrfikësi që ishte përballë tij dhe nën praninë e kamerave ka pranuar çdo pretendim dhe nuk ka kundërshtuar. “Unë jam palë me ty. Shërbimi zjarrfikës ka nevojë të kompletohet me pajisje, me mjete të modernizuara siç i kanë kudo, me mjete bashkëkohore” ka thënë zjarrfikësi.
“Po kur?” ishin fjalët e të afërmit të viktimës. “Djali jonë vdiq” tha ai me lot në sy. “Asnjë lloj aparature nuk e keni të na shpëtoni fëmijët. Unë e vlerësoj shumë mundimin tuaj. E vlerësoj shumë se edhe ju njëlloj jeni, rrezikoni aty. Po ti rrezikon jetën pa asnjë pajisje, si do ta shpëtosh djalin tim?”
Pas këtyre fjalëve zjarrëfikësi i Tiranës iu kthye gazetarëve, me shpresën se këta e kishin kuptuar edhe hallin e tij: “Besoj se me çfarë u dëgjua e çfarë u tha, unë besoj se po të isha gazetar si ju, unë nuk do të bëja më pyetje” tha ai, duke u larguar, me shpresën që nesër nuk do të jetë viktima e radhës.©Lapsi.al
