Dëshmitë e rrethit të ngushtë familjar e shoqëror të Klevis Kapllanit, që u vra në Rrogozhinë, kanë bërë që policia të zgjerojë pistën e hetimeve. Miq të 33-vjeçarit u kanë dhënë hetuesve emrat e personave me te cilët Kapllani shoqërohej më shumë. Mes tyre ka edhe emra të personazheve të njohur të botës së krimit. Njëri prej tyre është dhe Emiljano Ramazani, i cili u vra në 20 korrik në Elbasan, brenda makinës së tij. Dyshimet e policisë janë se 33-vjeçari Klevis Kapllani, i njohur ndryshe edhe me emrin Bledar, mund të ketë pasur informacione lidhur me ngjarjet e fundit të ndodhura në qarkun e Elbasanit.
Ndërkohë, pista kryesore vijon të jetë ajo e hakmarrjes për shkak të trafikut te drogës mes Italisë e Holandës. 33-vjeçari Kapllani ka qenë dy herë i dënuar në Itali për trafik droge. Klevis Kapllani u ekzekutua brenda mjetit të tij në afërsi të banesës, në fshatin Sinaballaj të Rrogozhinës, mbrëmjen e 14 shtatorit. Ndërsa trupi i pajetë u gjet nga një banor i zonës, pas disa orësh.
