Ditën e nesërme pritet të shpallet fituesi për ndërtimin e tunelit të Llogarasë. Në fjalën e saj ministrja e Infrastrukturës dhe Energjisë Belinda Balluku tha se siguria rrugore dhe eficenca e kostos janë dy elementët kryesore, që u nënvizuan edhe nga kompanitë.
Sipas ministres procesi i tenderimit duhet të nisë brenda këtij vitit..
“Dua të them që siguria rrugore për ne është e rëndësishme. Në të dyja prezantimet kjo ishte diçka që u nënvizua nga të dyja studiot projektuese. Unë shpresoj që kur juria të kaloi edhe në një diskurs më të thellë të merret parasysh edhe eficenca e kostos. Duhet të garantojmë sigurinë rrugore përmes një investimi që duhet të jetë eficent. Zona e Llogarasë nuk kërkon vetëm një zgjidhje infrastrukturore por edhe një zgjidhje interesante arkitekturore, duke qenë se Llogaraja është një nga pikat më të rëndësishme turistike. Është një park kombëtar i mbrojtur, që është edhe dera hyrëse për pjesën më të bukur të Shqipërisë. Juria duhet të vazhdojë punën pa prezencën tonë dhe shpresoj që të dilni me rezultat sa më shpejt. Do të na duhet të nisim sa më parë, mundësisht brenda këtij viti, procesin e tenderimit për ndërtimin e tunelit të Llogarasë, i cili do të bëhet me fonde të buxhetit të shtetit, duke iu referuar partnerëve tanë ndërkombëtare. Koha për ne është e rëndësishme. Prandaj do të kërkoja nga ana e jurisë impenjim të plotë dhe nga ana e dy konsorsjumeve për të dhënë të gjitha detajet që juria ka nevojë. Nesër do të presim emrin e fituesit dhe për ti hapur rrugë qeverisë për ndërtimin e këtij tuneli”, tha ministrja.
I pranishëm ishte edhe ministri i Turizmit, Blendi Klosi, i cili tha se investimet në tunelin e Llogarasë do të ofrojë një shërbim elitar.
“Një nga polet e zhvillimit të turizmit është e gjithë riviera shqiptare, e cila duhet të jetë e mbrojtur. Aeroporti i Vlorës dhe tuneli i Llogarasë do të japin mundësinë që të gjitha investimet shqiptare dhe të huaja do të mund të ofrojnë një shërbim elitar për zonën e bregdetit”, tha Klosi.
