Greqia dhe Turqia rrezikojnë të përfshihen në konflikt të armatosur dhe të paprecedentë mes dy anëtarëve të NATO-s. Pas vendimit të Athinës për të nisur stërvitjet ushtarake detare dhe ajrore në zonat ku eksploron për gaz, anija sondë Oruç Reis, presidenti turk Rexhep Taip Erdogan paralajmëron Greqinë se do të jetë përgjegjëse për çdo përshkallëzim të situatës.
“Duke nisur nga tani, përgjegjëse kryesore për çdo përkeqësim të situatës në rajon është vetëm Greqia. Ky vend duhet ta kuptojë mirë se ata që i nxisin kundër nesh, do t’i braktisin kur grekët të dalin para marinës ushtarake turke”, tha Erdogan.
Erdogan i dërgoi në këtë mënyrë edhe një mesazh vendeve të Bashkimit Europian, kryesisht Francës që është renditur në krah të Greqisë në këtë konflikt.
Teksa tensionet janë në kulm, ministri i Jashtëm gjerman viziton këtë të mërkurë dy vendet, në përpjekje për t’i bindur të ulin tensionet dhe dialogojnë për zgjidhjen e mosmarrëveshjeve për zonat ekskluzive ekonomike.
