Ditën e sotme, Komisioni i Pavarur i Kualifikimit njoftoi se kishte çuar dosjen e ish-anëtarit të Gjykatës Kushtetuese, Besnik Imerajt në prokurori. Por, në një prononcim për OraNews, Imeraj është shprehur se është i qetë, pasi nuk ka shkelur asnjë ligj, ndërsa ka hedhur dyshime të forta se pas kësaj fshihet kryeministri Edi Rama.
“Kjo që po ndodh nuk ka asnjë bazë kushtetuese dhe ligjore. Që kur Edi Rama dhe qeveria bëjnë kontrollin e gjyqtarëve, çdo gjë është e qartë. Unë jam në rregull dhe nuk kam asnjë problem me ligjin dhe Kushtetutën. Kjo e gjitha është e motivuar politikisht.”, -tha Imeraj.
Në muajin Janar të këtij viti, Imeraj dha dorëheqjen nga Gjykata Kushtetuese, duke e motivuar largimin e tij për arsye personale. Kujtojmë se Imeraj ishte ndër të parët në listën e anëtarëve të Gjykatës Kushtetuese që do të thirrej nga organet e vettingut.
