Reshjet e shiut të rëna që prej pasdites së djeshme kanë sjellë përkeqësim të situatës së përmbytjeve në qarkun e Shkodrës.
Ministria e Mbrojtjes bën me dije se sipërfaqja e tokave që janë nën ujë është rritur.
Rreth 2520 hektarë tokë janë nën ujë, ndërkohë që banorët ngrenë alarmin për ujë të pijshëm dhe rezerva ushqimore për bagëtitë.
Qyteti Shkodër: Në zonën e Livadheve janë përmbytur 60 ha. Në këtë lagje ndodhen mbi 40 banesa me prezencë uji afër oborreve të tyre dhe nga këto 4 familje mbajnë bagëti, ku si pasojë e fushave të përmbytura paraqiten vështirësi në sigurimin e ushqimit për to.
Familjet e këtyre banesave furnizohen me ujë të pijshëm nëpërmjet puseve dhe ky paraqitet si problem. Në lagjen Ajasëm janë rreth 80 dynymë tokë e mbuluar nga uji dhe si pasojë 5 familje të kësaj lagje, të cilat mbajnë rreth 100 krerë bagëti, kanë vështirësi në sigurimin e ushqimit për to.
