Seanca dëgjimore e ministrit të Jashtëm Ditmir Bushati në Kuvend në lidhje me negociatat që pritet të zhvillohen me Greqinë, është shoqëruar me debate dhe akuza te ashpra.
Ndërsa Bushati lexonte kërkesat e opozitës të ndara në disa pika, ka shkaktuar irritimin e deputetëve të PD.
I pari që ka shpërthyer ka qenë Edi Paloka, i cili ka ndërhyrë me fjalë ofenduese ndaj ministrit, pasi sipas tij ky i fundit ironizonte duke cituar edhe shenjat e pikësimit në kërkesat e paraqitura prej deputetëve të opozitës.
Ministri ka ngritur pyetjen teksa lexonte se nuk e kupton pse duhen dy pikëpyetje.
“Kjo është abc-ja në sistemin arsimor se si të mos prodhojmë letra të tilla”, - u shpreh Bushati.
Në këtë moment ka ndërhyrë Paloka duke i thënë: “Kur të shkoni në bordellot e Brazilit fol kështu. Legen. Mos na trego në gjuhën shqipe”.
Nga ana tjetër ministri ka kërkuar nga kryetarja Kodheli që të mbahet qëndrim.
“Zërin mos e ngrini, ju kërkoj të mbani qëndrim për epitetet që përdorët. Unë jam i qetë. Tre gjerave nuk kam ça ti bëj; Egos, paranojës dhe Saliut", - tha ai.
