Në ankimimin që bëri në vitin 2009 në Gjykatën Kushtetuese kundër marrëveshjes me Greqinë, Partia Socialiste pati një sërë pretendimesh. Një prej tyre ishte se një marrëveshje e re e detit me Greqinë nuk ishte e nevojshme, pasi kufiri detar ekzistonte.
Pretendimi i socialistëve në atë kohë ishte formuluar si më poshtë:
"Nuk ishte i nevojshëm përcaktimi i kufirit të hapësirave detare midis Shqipërisë dhe Greqisë, pasi ky kufi ka qenë i përcaktuar më parë. Në Protokollin e Firences 1913 është pranuar se kufiri midis Shqipërisë dhe Greqisë në zonën e kanalit të Korfuzit kalon përmes ngushticës, gjë e cila nuk është kontestuar asnjëherë nga palët. Gjithashtu, me ligjet e miratuara nga parlamenti shqiptar (ligji nr.8771, dt.19.04.2001 “Për kufirin shtetëror të RSH”, i shfuqizuar me ligjin nr.9861, dt.24.01.2008) janë parashikuar si pjesë të territorit shqiptar si ujrat territoriale ashtu dhe ujrat e brendshme"
Por në intervistë me Baton Haxhiun në Zonën e Debatit, kryeministri Edi Rama tha se një marrëveshje të re për kufirin detar nuk e kërkoi pala greke, por e kërkoi pala shqiptare.
"Nuk e kërkuan grekët rishikimin e marrëveshjes, nuk e kanë grekët çështjen e marrëveshjes. E kemi ne. Na dilka se ne po japim territor, se ne po falkemi det, siç thonë gjuhët e shthurura, pasi kanë lexuar gjithë shpërfaqjen në kazanin e medias." u shpreh Rama.
Se çfarë e bëri Edi Ramën të ndryshojë qëndrim nga viti 2009 në vitin 2018 mbetet mister, por pohimi i mësipërm u bë, pasi Baton Haxhiu e pyeti, nëse kufiri detar po negociohet në këmbim të mbështetjes së Greqisë për hapjen e negociatave.©Lapsi.al
