Analisti Fatos Lubonja kritikoi mungesën e transparencës që shoqëron bisedimet shqiptaro-greke, në mesin e të cilave qëndron edhe çështja e kufirit detar me Greqinë.
Sipas Lubonjës, kjo është një çështje sensitive për shqiptarët, dhe prandaj po negociohet në heshtje. Lubonja thekson se kur ministri Ditmir Bushati hesht për këtë çështje, është homologou i tij grek, Nikos Kotzias, i gatshëm të na informojë.
Kujtojmë se Kotzias u shpreh sot se Shqipëria ka pranuar të zgjerojë zonën ujore greke me 12 milje detare.
Lubonja kujtoi se si reagonte Edi Rama kur qeveria Berisha arriti një marrëveshje për këtë kufi detar. “Tradhëti kombëtare” – e quajti Rama atëherë. Sipas Lubonjës, edhe kjo mazhorancë e re bën sërish pazar në kurriz të shqiptarëve.
“Kjo është një çështje që mund të komentohet gjatë. Së pari për këtë çështje nuk ka transparencë nga pala shqiptare. Sot sqarojmë se mungesa e transparencës lidhej me çështjen e detit që nuk donin të na e thonin. Primare duhet të jetë çështja e detit. Ne e dimë se ka patur një marrëveshje të qeverisë Berisha për çështjen e detit, e cila u hodh poshtë nga Gjykata për çështje teknike. Dhe në atë kohë pat një reagim të madh dhe Rama e quajti tradhti kombëtare. Por sot po ndodh kjo gjë. Dhe na del që përsëri kur vjen një mazhorancë bën Pazar në kurriz të shqiptarëve, duke mashtruar grekët.
Së pari do të ishte normale që kjo opozitë që bërë protestë në atë kohë, kur qeveriste Berisha, nëse do ishte serioze duhet të ishte konsultuar me ekspertë për të bërë kundërshtim me baza. Por sot që mori pushtetin i del që paskan të drejtë greket, dhe përsëri duhet të konsultohet me ekspertë dhe t’i thotë popullit po, ne kemi gabuar’ .por këtu nuk ndodh. Del ministri shqiptar dhe nuk na thotë se çfarë është biseduar. Por del greku dhe na e thotë. Kjo është politika e Edi Ramës”,- u shpreh Lubonja në rubrikën “Opinion”.
