Kryeministri Edi Rama u është përgjigjur sulmeve të opozitës, kryesisht LSI-së, lidhur me negociatat për marrëveshjen e re të detit. Debati është ndezur pasi ministri i Jashtëm grek, Nikos Kotzias, ka deklaruar për mediat në Athinë se me marrëveshjen e re, vendi i tij përfiton rreth 10 milje më shumë hapësirë detare. Rama në reagimin e tij shprehet se ne do t’i mbyllim me dinjitet marrëveshjet me Greqinë, ndërsa ironizon LSI-në duke përdorur si simbol çizmen e Monika Kryemadhit. Por Rama nuk mohon debatin Kotzias-Bushati pë paktin detar dhe as deklaratat e ministrit të Jashtëm të Greqisë. Kjo le vend për shumë dyshime, aq më tepër kur negociatat janë zhvilluar në mungesë transparence të plotë. Deri më tani nuk dihet asgjë konkrete nga cfarë kanë vendosur dy palët në takimet e Kretës dhe Korcës. Më poshtë reagimi i plotë i Ramës.
Patriotë me çizme e çamëristë të sapongjizur në kazanin politik e mediatik, pasi i lanë poturet për çerekshekulli varur në telin e fqinjit dhe harruan edhe detin në shtëpinë e tij, na janë ndezur sot flakë e zjarr për të bërë shkrumb e hi qeverinë, në turrën e akuzave për tradhëti!
Janë të mjerë që meritojnë veç mëshirë, po kujt ndër ju shqetësohet prej çizmeve të patriotizmës së tyre pa din e as iman, i them bëj durim edhe pak e prit, sa të shkruhen gjërat e zeza mbi të bardhë në dokumentet e marrëveshjes së re me fqinjin.
Dhe ndërkohë mos dysho hiçfare se ne që ditëm t’i hapëm me kurajo e dinjitet, hesapet e 70 vjetëve me fqinjin, ne dimë edhe t’i mbyllim ne dinjitet e mirëkuptim, në interes të Shqipërisë e të shqiptarëve pa dallim.
