Policia ka zbardhur plagosjen e ndodhur dy ditë më parë në Vlorë. Me anë të një njoftimi zyrtar, blotë sqarojnë se Turi Aligjoni 55 vjeç, autor i plagosjes së 27-vjeçarit Kevi Lazaj, me armë zjarri të ndodhur më 7 qershor është arrestuar. Gjithashtu në pranga ka rënë edhe një 48 vjeç.
Të dy ishin të shpallur në kërkim kombëtar për veprat penale “Plagosja e rëndë me dashje”, “Mbajtja pa leje e armëve”, “Përkrahja e autorit të krimit” dhe “Prodhimi dhe shitja e narkotikëve”.
Gjatë operacionit policia sekuestroi katër armë zjarri pistoleta të markave “Glock”, “Sig Sauer” dhe “Canik”, municion luftarak, shtatë telefona celularë, 1850 euro dhe tre automjete, dy prej të cilave me targa të huaja. Njëri prej mjeteve ishte i blinduar.
Nga hetimet paraprake ka rezultuar se automjeti tip “BMW X5”, i sekuestruar gjatë operacionit, ishte përdorur nga Turi Aligjoni për tu larguar nga vendi i ngjarjes pas plagosjes. Ndërkohë, Policia dhe Prokuroria po vijojnë hetimet për dokumentimin e plotë të aktivitetit kriminal të grupit dhe identifikimin e personave të tjerë të përfshirë në veprimtarinë e tij të paligjshme.
