
Gjykata e Apelit ka vendosur të lehtësojë masën e sigurisë për 25-vjeçarin Enea Zyferi, i dyshuar për përkrahje të autorit të krimit në çështjen e zhdukjes dhe vrasjes së Eglant Koçit. Apeli ka zëvendësuar masën e sigurisë “arrest në burg” me atë të “arrestit në shtëpi”, duke bërë që Zyferi të largohet nga qelia. 25-vjeçari dyshohet se ka ndihmuar autorin e krimit pas ngjarjes, ndërsa hetimet për zbardhjen e plotë të rrethanave të vrasjes vijojnë.
Eglant Koçi është zhdukur më 4 qershor dhe për herë të fundit është parë në zonën pranë sheshit “Willson” në kryeqytet. Policia ka arritur gjithashtu të gjejë nga kamerat e sigurisë edhe disa episode të lëvizjes së tij me motor nëpër Tiranë. Koçi rezultonte i punësuar në një mobileri, por policia dyshon se ai ishte i përfshirë në aktivitetin e kriptomonedhave, që është një ndër pistat hetimore mbi të cilat është fokusuar policia.